Зам тээврийн хөгжлийн сайд Д.ГАНБАТААС зарим зүйлийг тодрууллаа.

-ТавантолгойГашуунсухайт чиглэлийн төмөр замыг барьж байгуулахад Засгийн газрын байр суурь ямар байна вэ?

-Бид аль болох хурдан эхлүүлэх л зорилттой байна. Автомашинаар нүүрсний тээврийг хийхэд 10-12 сая тонноос хэтрэхгүй нь тодорхой. Иймээс төмөр замыг тавих зайлшгүй шаардлага байна. Энэ бүтээн байгуулалтыг хийчихвэл жилдээ 30 сая хүртэл тонн нүүрс экспортлох боломж бүрдэх юм.

-Хятадуудын барьсан төмөр зам, манайхны шинэ төмөр зам хоорондоо 30-аад км-ийн зайтай гээд байх юм. Тэгээд яаж холбогдох вэ?

-Гашуунсухайт боомт дээр очоод Хятадын төмөр замтай хаагуур яаж холбогдох талаар уулзаж ярилцлаа. Одоохондоо эцсийн шийдэлд хүрээгүй байна. Манай ГХЯ-наас Хятадын талд ноот бичиг хүргүүлсэн. Түүнд хилийн 700 дугаар баганын зүүн талаар төмөр замаа холбох саналаа илэрхийлээд байгаа. Ерөнхийлөгч Ц.Элбэгдорж Ташкентад Хятадын талтай уулзахдаа ч энэ хувилбарыг уламжилсан. Өмнөд хөрш хилийн 703 дугаар баганын зүүн талаар төмөр замаа авчраад тулгачихсан байдаг. Үүгээр холбогдоно гэвэл гүүрэн зам тавих хэрэгтэй болчихоод байгаа юм. Үүнд 120-150 сая ам.долларыг нэмж санхүүжүүлэх шаардлагатай. Иймээс энэ талаар дахин ярилцахаас өөр аргагүй болчихоод байна.

-Чингис бондын хөрөнгө, Хөгжлийн банкны санхүүжилтээс 200 сая ам.доллар “залгичихаад” байгаа төмөр замын бүтээн байгуулалт одоо хэдэн хувьтай байна вэ?

-Төмөр замын далангийн ажлын 80 гаруй хувийг хийгээд зогссон. Шалтгаан нь санхүүжилттэй холбоотой. Мөн Хятадын төмөр замтай холбогдох цэгээ тохироогүй байгаа нь ч нөлөөлсөн. Хоёр жилийн өмнөх энэ бүтээн байгуулалт бороо ус, байгалийн бусад хүчин зүйлийн нөлөөллөөр элэгдэж, эвдэрч буй учраас энэ ажлыг яаралтай цааш үргэлжлүүлэх л шаардлагатай байна.

Д.Мөнх