Энэ оны Нобелийн утга зохиолын шагналыг хүртсэн Америкийн дуучин, яруу найрагч Боб Дилан шагнал гардуулах ёслолд оролцохгүй гэдгээ албан ёсоор мэдэгджээ. Ирэх сарын 10-нд Шведийн Стокгольм хотноо болох шагнал гардуулах хүндэтгэлийн арга хэмжээнд энэ жилийн Нобелийн эзэд цугларч, шагналаа хүлээн авах юм. Тэрбээр, Шведийн эзэн хааны академиас илгээсэн захидалд “Урьдчилан төлөвлөсөн ажилтай тул оролцохгүй” хэмээн хариу өгсөн байна. Харин академийн зүгээс “Түүнийг шагнал гардуулах ёслолд хүрэлцэн ирж, шагналаа авч хүндэтгэлийг мэдрээсэй гэж хүсч байна” гэжээ. Түүнчлэн Нобелийн шагналтан бүр илтгэл тавих ёстой байдаг бөгөөд Боб Дилан шагналаа хүлээн авсныхаа дараа илтгэл тавих хүндтэй үүрэг үлдээд байгаа билээ. Үүнтэй холбогдуулан “Нобелийн шагнал гардуулснаас хойш зургаан сарын дотор илтгэлээ тавих ёстой. Түүний илтгэлийг тэсэн ядан хүлээж байна” хэмээн онцолжээ. Өмнө нь 2005, 2007 онд Нобелийн утга зохиолын шагналтан Гаролд Пинтер болон Дорис Лессинг нар шагнал гардуулах ёслолд оролцож байгаагүй аж. Боб Дилан нь Америкийн уламжлалт дууг орчин үеийн яруу найргаар баяжуулснаараа Нобелийн утга зохиолын салбарын шагналын эзэн болсон билээ.