Өнгөрсөн оны байдлаар дэлхийн хэмжээнд хүний дархлал хомсдолын вирусийн халдвар авсан 38 сая хүн амьдарч байна гэж Намиби улсын нийслэл Виндхук хотод танилцуулсан НҮБ-ын ДОХ-ын нэгдсэн хөтөлбөрийн тайланд дурджээ. Уг тайланд тэмдэглэснээр, дэлхийн хэмжээнд ХДХВ-тэй 38 сая хүн амьдарч байгаагийн 18 сая орчим нь эмэгтэйчүүд аж. Тэдний 1.8 сая нь 15 доош насны хүүхдүүд гэнэ. Зөвхөн өнгөрсөн онд гэхэд ХДХВ-ийн халдвар авсан хоёр сая гаруй тохиолдол шинээр бүртгэсний 150 мянга нь 15-аас доош насны хүүхдүүд байсан талаар онцлон тэмдэглэжээ. 2015 онд ХДХВ-тэй холбоотой өвчнөөр 1.1 сая орчим хүн, тэдний дотор 15-аас доош насны 110 мянган хүүхэд нас барсан байна. Сахарын цөлөөс урагш орших Африкийн улсуудад өнгөрсөн онд ХДХВ-ийн халдвар авсан 5700 тохиолдол өдөр тутам шинээр бүртгэдэг байжээ. Харин энэ оны зургаадугаар сарын байдлаар ХДХВ-ийн эмчилгээнд 18 сая хүн, тэдний дотор 910 мянган хүүхэд хамруулсан байна. Тайланд “ХДХВ-тэй тэмцэх хүчин чармайлтад ахиц дэвшил гарсаар байна. 2020 он гэхэд ХДХВ-тэй 30 сая хүнийг эмчилгээнд хамруулах зорилт тавьсан” гэж онцолжээ. Халдвар авсан тохиолдол цөөнгүй бүртгэгдсээр байгаа хэдий ч ХДХВ-тэй өвчтөнг эмчлэхэд ахиц дэвшил гарсаар байна гэж НҮБ-ын ДОХ-ын нэгдсэн хөтөлбөрийн гүйцэтгэх захирал Мишель Сидибе хэлсэн байна. Тухайлбал, 2000 онд ХДХВ-ийн 3.2 сая тохиолдол шинээр байсан бол 2015 гэхэд 1.5 сая болж буурчээ. Тэгвэл 2020 он гэхэд энэ тоо 0.5 сая болж буурах төлөвтэй байгаа аж. ХДХВ-ийн улмаас нас барсан хүний тоо ч 2020 он гэхэд 0.5 сая болж буурах төлөвтэй байна.