Монголбанк, Засгийн газартай хамтран өнгөрсөн сард 24.6 тэрбум төгрөгийн ипотекийн зээлийн санхүүжилт гаргасан байна. Үүнээс 258 зээлдэгчийн 15.7 тэрбум төгрөгийн зээлийг Монголбанкнаас санхүүжүүлсэн бол 133 зээлдэгчид 8.9 тэрбум төгрөгийг Засгийн газраас олгожээ. Мөн банкуудын ипотекийн зээлийн тайланг энэ оны наймдугаар сарын байдлаар нэгтгэсэн байна. Энэ дүнгээр ипотекийн зээлийн нэгдсэн үлдэгдэл 4.1 их наяд төгрөгт хүрсэн нь өмнөх оны мөн үеэс найман хувиар өссөн дүн боллоо. Сүүлийн нэг жилийн хугацаанд банкууд 827 зээлдэгчид 39.9 тэрбум төгрөгийн ипотекийн зээл олгосон байна. Нийт зээлийн үлдэгдлийн 95.3 хувь нь хэвийн, 2.8 хувь нь хугацаа хэтэрсэн бол 1.9 хувь нь чанаргүй зээлд шилжжээ.

Б.Мөнх