Уул уурхай, хүнд үйлдвэрийн яамнаас сар бүр зохион байгуулдаг "Ил тод, хариуцлагатай уул уурхай" сэдэвт хурал боллоо. Энэ үеэр Уул уурхай, хүнд үйлдвэрийн сайд Д.СУМЪЯАБАЗАР сэтгүүлчдийн асуултад дараах хариултыг өгсөн юм.

-ОУВС-гийн хөтөлбөрийн хүрээнд шатахууны Гаалийн онцгой албан татварыг үе шаттай нэмэхээр болсон. Үүнтэй холбоотойгоор он гараад шатахууны үнэ нэмэгдэх үү?

-ОУВС-гийн хөтөлбөрт хамрагдсанаар энэ онд шатахууны Гаалийн онцгой албан татварыг шатлалтайгаар нэмэхээр болсон. Сэргээн тогтоохдоо 30-100 мянган төгрөгөөр өөрчлөн тогтоосон. Ирэх онд онцгой албан татвар дахин нэмэгдэхгүй.

-Бензиний үнэ нэмэгдээд эхэллээ. Компаниудын үнэ яагаад ижил байдаггүй юм бэ?

-Газрын тосны бүтээгдэхүүний үнийг тогтворжуулах, зохион байгуулах үүрэг бүхий төр хувийн хэвшил гэж бий. Онцгой албан татвар нэмэгдэж байгаатай холбоотойгоор холбогдох газрууд болон импортлогч компаниудад албан бичиг, мэдээлэл хүргэсэн. Ойрын хугацаанд шатахууны үнэ нэмэгдэхгүй гэж ойлгож болно. Үнийг тогтвортой барих бодлогыг хэрэгжүүлж, компаниуд ч энэ тал дээр дэмжиж байна. Хэрвээ үнэ нэмэгдэхээр бол зөвлөл хуралдаж шийдвэрлэнэ. Шууд шатахууны үнийг нэмэх боломжгүй юм.

-Энэтхэг улстай хамтарч газрын тос боловсруулах үйлдвэр байгуулах асуудлыг ярьж байгаа. Үүнтэй холбоотой үнэ буурах боломж бий юү?

-Энэ ажлыг судалж, хэрэгжүүлэх талаар саналын шатандаа явна. Шууд л үйлдвэр байгуулчихна гэж ойлгож болохгүй. Бас цаасан дээрх төсөл болгоод, төсөвт дэмий мөнгө суулгахын оронд найдвартай болгочихоод ярьсан дээр байх. Ямар ч байсан газрын тос боловсруулах үйлдвэр байгуулах боломж бий болно гэж өөдрөгөөр харж байна.

М.Энх