Олон улсад тэргүүлэгч зөвлөх үйлчилгээний компани болох PricewaterhouseCoopers (PwC)-ийн зөвлөх үйлчилгээ хариуцсан захирал Майкл Адамсыг “Эрдэнэс Монгол” ХХК-ийн Гүйцэтгэх захирал П.Ганхүү хүлээн авч уулзлаа.

Энэхүү уулзалтаар “Эрдэнэс Монгол” компанийн охин болон хараат компаниуд дээр хэрэгжиж байгаа болон ойрын хугацаанд хэрэгжүүлэхээр төлөвлөж байгаа төсөл, хөтөлбөрүүд дээр хамтран ажиллах талаар ярилцлаа. Тодруулбал, “Багануур” болон “Шивээ-Овоо” ХК-ийн үйл ажиллагааг сайжруулах чиглэлд хоёр талын хамтын ажиллагааг өргөжүүлэхээр санал солилцов.

PricewaterhouseCoopers (PwC) компани нь дэлхийн 158 оронд салбартай, 250 мянга гаруй мэргэжилтэн ажиллаж, хоорондоо санал бодол, туршлагаа солилцож, харилцагч нартаа олон улсын жишигт нийцсэн шинэлэг шийдлийг санал болгож, зөвлөгөө өгдөг. Тус компани нь аудитын үйлчилгээ үзүүлэхээс гадна татварын болон бизнесийн бүх чиглэлээр зөвлөгөө өгдөг юм.