Ирэх онд Бразилийн Рио де Жанейро хотноо зуны Олимпийн ХХХI дэх наадам болно. Хүн төрөлхтний цэнгэлийн манлай болсон спортын хамгийн том баяр наадамд оролцох баг тамирчдын сонгон шалгаруулалт үргэлжилж байна.

Хүндийг өргөлтийн төрөлд одоогийн байдлаар 107 орны 173 тамирчин Олимпийн эрхээ авсан. Тодруулбал Беларусь, БНХАУ, Казахстан, БНАСАУ, ОХУ 10, Колумб, Египет 9, Индонези, БНСУ, Тайвань, Украйн 7, Армени 6, Иран, Молдав, Узбекистан 5, Азербайжан, Герман, Япон, Польш 4, Франц, Гүрж, Мексик, Румын, Испани, Турк, АНУ, Венесуэль, Вьетнам 3, Доминикан, Эквадорын тус бүр хоёр тамирчин Риод өрсөлдөх эрхийг аваад байна.

Өнгөрсөн сарын 20-ноос 28-ны өдрүүдэд АНУ-ын Хьюстон хотод хүндийг өргөлтийн 2015 оны дэлхийн аварга шалгаруулах тэмцээн болсон. Олимпийн эрх олгох тус харицлагатай тэмцээнд БНХАУ 6 алт, 4 мөнгөн хүртэж багийн дүнгээр тэргүүлсэн. Харин ОХУ 3 алт, 3 мөнгө, 3 хүрэл, Казахстан 2 алт, 2 мөнгө, 1 хүрэл, БНАСАУ 1 алт, 3 мөнгө, 2 хүрэл медальтай удаах байруудыг эзэлсэн юм.

М.Золбаатар