Хот байгуулалт, барилга, орон сууцжуулалтын сайд Э.Бат-Амгалангаас БНХАУ-ын буцалтгүй тусламжаар баригдсан 1008 айлын орон сууцны талаар тодрууллаа.

Тэрбээр "БНХАУ-ын буцалтгүй тусламжаар барьсан 1008 айлын орон сууцыг 2025 оны арванхоёрдугаар сард Улсын комисс бүрэн хүлээн авсан. Одоо энэ орон сууцыг иргэдийн газраар солих ажлын судалгааг хийх ажлын хэсэг гарч, ажиллаж байна. Тэрнээс биш хэн дуртайд нь шууд худалдахгүй. Энэ орон сууцыг зөвхөн газраар солино. Ингэхдээ Сонгинохайрхан дүүргийн Долгор, Баянзүрх дүүрэгт амьдардаг иргэн Дондогийн газраар солихгүй. Нийслэлийн инженерийн шугам, дэд бүтцэд холбогдсон гэр хорооллын айлуудын газар чөлөөлөлтийг хийж, дараагийн төсөл хөтөлбөр буюу орон сууцыг барих чиглэлээр ажиллана. Тийм учраас Улаанбаатар хотын 2040 он хүртэлх бүсчилсэн төлөвлөгөөтэй уялдах юм. Нийслэлийн төвийн зургаан дүүрэгт дэд бүтцэд холбогдсон газрууд бий.

Бид Засгийн газарт ирэх гуравдугаар сарын 15-нд эцэслэн танилцуулна.

Энэ орон сууцанд эмч, багш нарыг хамруулахаас илүү манай яаман дээр 5002 айлын "Солонго-1" болон "Солонго-2″ төслийг хэрэгжүүлж байна. Энэ оны сүүлчээр эхний 60-70 хувийн айлууд орж эхэлнэ. Энэ орон сууцанд иргэд байраа түрээслээд өмчлөх боломжтой" гэв.

Засгийн газрын хуралдаанаар 2025 оны аравдугаар сард Сүхбаатар дүүргийн есдүгээр хороо Ногоон нуур орчимд БНХАУ-ын буцалтгүй тусламжаар баригдсан 1008 айлын орон сууцнаас 752-ыг нь өмчлүүлэх, үлдсэн 252 байрыг түр хугацаагаар түрээслүүлэх зарим арга хэмжээний тухай Засгийн газрын тогтоол баталсан. БНХАУ-ын буцалтгүй тусламжаар баригдсан 1008 айлын орон сууцыг дагаж 960 хүүхдийн суудалтай ерөнхий боловсролын сургууль, 250 хүүхэд хүлээн авах хүчин чадалтай цэцэрлэг баригдах юм. Өнгөрсөн 2022 зургадугаар сараас барилга угсралтын ажлаа эхлүүлсэн “Ногоон нуур 1008 айлын орон сууц”-ны төсөл ашиглалтад орж, 2025 оны аравдугаар сарын 16-нд, хүлээн авах ёслол болсон юм.

Төслийн хүрээнд 100 гаруй айлыг чөлөөлж, 4.4 га талбайг хамарсан бүтээн байгуулалтыг гурван жилийн хугацаанд барьж гүйцэтгэсэн байна.

Тус 1008 айлын орон сууц нь нийт найман блок, 21 давхар цутгамал төмөр бетон хийцтэй бөгөөд газар доороо зоорьтой. Барилгын ажил эхлэхэд хөрсний ус ихтэй байсан учраас 19 цооног өрөмдөж, хөрсний усыг  хатаажээ. Ингэснээр, зоорийн давхар үер усанд автахааргүй болсон байна. Нэг давхартаа нийт зургаан айл байрлах ба 49.95 болон 55.04 м.кв талбай бүхий хоёр өрөө орон сууц.

Төслийг БНХАУ-ын буцалтгүй тусламжаар хэрэгжүүлсэн бөгөөд дахин төлөвлөлтийн ажил 2019 оноос хойш яригдсан ч цар тахалтай нүүр тулж, хорио цээрээс шалтгаалан хоёр жил алдсан.

Анх 2014 оны наймдугаар сард БНХАУ-ын дарга Си Зиньпин Монгол Улсад айлчлах үеэрээ Монгол Улсад нэг тэрбум юанийн буцалтгүй тусламж олгохоо мэдэгдсэн. Улмаар 2016 оны долдугаар сард Хятадын Ерөнхий сайд Ли Кэцян Монголд айлчлахдаа тусламжийн 350 сая юанийг гэр хорооллыг дахин төлөвлөх төсөлд зарцуулах тохиролцоо хийсэн байдаг.