Гэмтэл согог судлалын үндэсний төвийн эмч нар өчигдрөөс төлөвлөгөөт мэс засал хийхгүй, улмаар тайван суулт хийж эхэлсэн. Тэдний ийнхүү эсэргүүцэл илэрхийлж байгаа шалтгаан нь тус эмнэлэгт Ц.Энхбаяр гэх эмэгтэй тус эмнэлгийн даргаар томилогдож ирж байгаатай холбоотой гэх. Харин тус эмнэлэгт үүсээд байгаа нөхцөл байдалтай холбогдуулан Эрүүл мэндийн сайд Н.Удвал тушаал гаргасан байна.

Уг тушаалд “ГССҮТ дээр үүссэн нөхцөл байдлыг судлан, уг төвийн хэвийн үйл ажиллагааг хангах. Хууль бус үйлдлээ үргэлжлүүлсний улмаас тусламж, үйлчилгээний хүлээгдэл чирэгдэл үүсэх, хүний амь нас, эрүүл мэндэд хохирол учирсан тохиолдолд хууль бус ажиллагааг зохион байгуулсан эмч, эмнэлгийн мэргэжилтэн, ажилтнуудад холбогдох хуульд заасны дагуу хариуцлага тооцож ажиллахыг Гэмтэл согог судлалын үндэсний төвийн захирал /Ц.Энхбаяр/-т үүрэг болгосугай” гэжээ. Тэгэхээр улс төрийн томилгоо хэмээн эсэргүүцэж байсан тус эмнэлгийн эмч ажилчид суулт хийгээд нэмэргүй бололтой. Эрүүл мэндийн сайд гаргасан тушаалаасаа буцахгүй гэдгээ энэ удаагийн тушаалаараа батлаад байна.