“Эрүүл байвал юуг ч бүтээж, ямар ч бэрхшээлийг давж чадна” гэж хүн бүр бодож бас ярьцгаадаг. Цоо эрүүл байна гэдэг үнэндээ санааных биш. Ялангуяа бэлгийн эрүүл мэндийн тухайд бол бүр ч хэцүү. Гэхдээ чи өөрийн биеэ хайрлан, өөрийгөө үнэлэн тодорхойлж, эрүүл энх байхад өөрөөсөө хамаарах бүх зүйлийг санаачлан хийх хэрэгтэй.

Одоо бүгдээрээ бэлгийн эрүүл мэндээ хэрхэн хамгаалах талаар ярилцацгаая. Дараах хэдэн зөвлөмжийг л амьдралдаа бүрэн хэрэгжүүлж чадвал чи сэтгэл тайван амьдрах болно.

-Үнэн зөв, найдвартай мэдээллийг авч бай. Хүний бэлгийн амьдрал, эрүүл мэндтэй холбоотой мэдээ мэдээллийг найдвартай эх сурвалжаас авч, өөрийн мэдлэгээ дээшлүүлэхэд анхаараарай.

-Оновчтой, ухаалаг шийдвэр гаргаж бай. Хэн нэгэн хүн чиний бэлгийн эрүүл мэндийг хамгаална гэж хэзээ ч бүү найд хөвгүүд минь. Өөрийнхөө зөн совин итгэл үнэмшилийг даган зүрх сэтгэлээ чагнаж байж шийдвэр гаргаж сур.
Харин гаргасан шийдвэртээ туйлын үнэнч бай. Архи дарс, мансууруулах бодисоос хол яв. Аз турших, бодлогогүй алхам хийхийг өөртөө ч өрөөл бусдад ч бүү олго. Сүүлд нь харамсаж гутрахаар нөхцөл байдалд өөрийгөө оруулахаас сэргийл, хамгаал.

-Дотны найзтайгаа ярь, байнга илэн далангүй ярилц. Бие биеэ чин сэтгэлээсээ хүндэлдэг, ямар ч асуудлаар санал бодолоо илэн далангүй хуваалцдаг, ялангуяа хэн хэнийхээ хувийн сонголтыг хүндэтгэн сонсдог тохиолдолд эрүүл сайхан харилцаа бий болно. Урьдын үерхэл хайр сэтгэлийн асуудалд алдаж, онож байсан хөгтэй үеэ ч ярьдаг байх хэрэгтэй. Мөн та хоёрын одоогийн харилцаа ямархуу хэмжээнд байхыг хүсдэг, сексийн талаар ямар бодолтой явдаг тухайгаа хуваалц.

-Бэлгийн хавьталд орох бүртээ бэлгэвч хэрэглэж сур. Урьд нь чи хамгаалалтгүй бэлгийн харилцаанд орж байсан бол “би хэзээ ч өвчин авч байгаагүй азтай” гэж өөртөө гэнэнээр найдалгүй бэлгийн хавьталд орох бүртээ бэлгэвчийг “ДАНДАА” хэрэглэ. Энэ бяцхан найз чинь чамайг бэлгийн замын халдварт өвчнөөс найдвартай хамгаалах болно.

-Хэрэв хамгаалалтгүй бэлгийн хавьталд орсон бол  заавал эмчид хандан зөвлөгөө авч, шинжилгээ өгөөрэй. Ганц удаа ч гэсэн болчимгүй алхам хийчихээд дараа нь “яасан бол” гэж дотроо шаналж явах хэрэггүй. Зүгээр л санаа зоволтгүй эмчид хандаарай.