ГССҮТ-ийн 184 эмч ажилтан ажлаасаа чөлөөлөгдөх өргөдөл хүсэлтээ гаргаад байгаатай холбогдуулан Монголын эрүүл мэндийн ажилтны үйлдвэрчний эвлэлийн холбооны дэд дарга Ч.Нарантуяагаас тодрууллаа.

-Одоогоор долоон эмч ажлаасаа албан ёсоор халагдсан байна. Өргөдлөө өгсөн бусад эмч нарын асуудлыг яаж шийдвэрлэх вэ?
-Халагдсан долоон эмчээс бусад нь ажил үүргээ хэвийн гүйцэтгэж байгаа. Гэхдээ энэ сарын 30-ныг хүртэл ямар нэгэн бодитой шийдэлд хүрч чадахгүй бол эдгээр эмч хуулийн дагуу ажлаасаа чөлөөлөгдөнө. Энэ асуудлыг шийдвэрлэхээр Эрүүл мэндийн яамнаас ямар ч арга хэмжээ авахгүй байна. Н.Удвал сайдад энэ асуудлаар гурван удаа хандаж, албан бичиг хүргүүлсэн. Нэг ч удаа хариу өгөөгүй. Салбар яам нь шийдвэрлэж чадахгүй байгаа юм чинь. Төр засаг нь шийдэх хэрэгтэй. Олон хүний амьдрал амь насны асуудал яригдаж байна шүү дээ.

-Эмч нар суулт зарласан шүү дээ. Ард түмнийхээ төлөө андгай тангараг өргөсөн эмч, өвчтнийхөө амь насыг тоолгүйгээр суулт зарлаж болдог юм уу?
-Сонгон шалгаруулалт ороод тэнцээгүй хүнийг ГССҮТ-ийн удирдлагаар томиллоо гээд тус эмнэлгийн ажилчид суулт зарлаж байна гэж Б.Мягмар дарга бид хоёрыг дуудуулсан. Бид очиж суултыг нь зогсоосон. Тэгээд Эрүүл мэндийн сайдтай манай ҮЭ-ийн холбоо, ГССҮТ-ийн эмч нарын төлөөлөл уулзаж, сонгон шалгаруулалтыг дахин явуулж, тэр болтол сайн ажиллаж яамныхаа нэг газрын даргыг түр томилооч гэдэг санал тавьсан. Гэтэл Н.Удвал сайд өөрийн томилсон хүнийхээ тушаалыг буцаахгүй гэсэн байр суурьтай байгаагаа илэрхийлсэн л дээ. Түүнээс хойш ГССҮТ-ийн эмч нарын төлөөлөл сайдад гурван удаа албан бичиг явуулсан боловч нэг ч удаа хариу өгөөгүй. Мөн суулт зарласны дараахан очиж, ажлын явцтай нь танилцсанаас хойш яамнаас хүн очоогүй байгаа. Энэ асуудлын уршгаар иргэд хохирч байна гэдгийг ЭМЯ-ыхан мэдэхгүй байна шүү дээ.