ГССҮТ-ийн даргын томилгооны асуудал хурцдаж өдгөө хуучин эмч нар ажлаа өгөх дээрээ тулаад буй. Өөрөөр хэлбэл, Эрүүл мэндийн сайд Н.Удвал ГССҮТ- ийн даргыг удаа дараа сольж, улмаар эмнэлгийн даргын сонгон шалгаруулалтад тэнцээгүй Ц.Энхбаяр гэгчийг тус эмнэлгийн даргаар томилсон нь эмч нарын эсэргүүцэлтэй тулгараад буй. Салбарын сайд нь ийнхүү нэг эмнэлгээр тоглож, даргыг нь удаа дараа сольж байгааг эсэргүүцэн ГССҮТ-ийн эмч нар өнгөрсөн сарын эхээр халагдах өргөдлөө өгч эхэлсэн. Одоогоор ийнхүү халагдах өргөдлөө өгсөн 180 гаруй эмч сувиалагч байгаагаас шинэ даргын цохолтоор найман эмч ажлаасаа халагдаад байгаа юм. Түүнчлэн ажлаасаа халагдахаар өргөдлөө өгсөн хүмүүсийн өргөдлийг шийдвэрлэх хугацаа өнөөдрөөр дуусгавар болж байгаа. Өөрөөр хэлбэл, салбар яам нь ГССҮТ-ийн эмч нарын өргөдлийг шийдвэрлэж өгөхгүй бол тус эмнэлгийн үндсэн эмч нар ажлаа орхиж явах нөхцөл байдал үүсээд байгаа юм. Өөрсдийнх нь тавьсан асуудалд анхаарал хандуулан, салбарын сайд нь томилгоогоо эргэж харах байх хэмээн хүлээж суусан эмч нарын найдвар талаар болж буйг шинэхэн дарга Ц.Энхбаяр өчигдөр баталлаа. Тэрбээр хэвлэлийнхнийг өрөөндөө дуудан мэдээлэл хийх үедээ “Эмч нар ёс зүйгээ умартан ажлаа хаяж явах ёсгүй. Тэгээд ч бид ийм байдал үүсэхгүй гэж найдаж байна. Гэхдээ эмч нар ажлаа хаяад явбал бид дараагийн хүмүүсээ бэлэн байлгахыг зорьж байна. Энэ ч үүднээс бусад эмнэлгүүдээс ГССҮТ-рүү очих эмч нарыг сонгон бэлдэж эхэлсэн” хэмээлээ. Тэрбээр ийнхүү мэдэгдсэнээр улс нэг эмнэлгийнхээ үндсэн ажилчдыг нэг дор бөөнөөр нь “алдах” нөхцөл үүсээд байна. Ямартаа ч асуудал хэрхэн шийдэгдэхийг харах л үлдлээ.