“СөүлСонму” эмнэлэгт Б.Нэргүй хэмээх 6 настай монгол хүүд дэлхийд анх удаа хамар суулгах 3D хагалгаа амжилттай хийсэн тухай Солонгосын мэдээллийн хэрэгслээр цацаж байна. Эмч нар дэлхийд анхны энэ мэс заслынхаа талаар сэтгүүлчдэд ярьжээ. Дэлхийн хэмжээнд төрөлхийн хамаргүй төрсөн 6 хүүхэд бүртгэгдсэнээс монгол бяцхан хүүгээс бусад нь ойндоо хүрэлгүй өөд болжээ. Солонгосын EBS телевизээр Б.Нэргүй хүүгийн амьдралын талаарх нэвтрүүлэг гарсаныг үзсэн сайн санаат хүмүүс, тусламжийн байгууллага буяны гараа сунгаж 3 удаагийн мэс заслын бүх зардлыг нь даасан байна. Б.Нэргүй ээжтэйгээ энэ оны 4 дүгээр сард Солонгост очоод байсан юм. Хиймэл эрхтэн суулгах дэлхийд анхны 3D мэс заслаар сайн санаат солонгос эмч нар Nergui stand патент авах хүсэлтээ бэлтгэж байна. Нэргүйгийн гэрийнхэн хагалгаа амжилттай болсонд маш их баяртай байгаа бөгөөд СөүлСонду эмнэлэгийн эмч нарт маш их баярлаж байгаагаа хэлж байлаа.