“Ионсей” гэх эмнэлэг үйл ажиллагаа явуулаад багагүй хугацаа өнгөрч буй. Харин тус газрын үйл ажиллагааг Мэргэжлийн хяналтын газраас хаан шалгаж байгаа тухай мэдээлэл тархаж байсан билээ. Тэгвэл Мэргэжлийн хяналтын шалгалтын дүн гарчээ. Тухайлбал, “Ионсей-Найрамдал” эмнэлгийн мэс заслын болон дурангийн үзлэг, оношилгооны тусламж үйлчилгээг 2013 оны арванхоёрдугаар сарын 23-ны өдрөөс эхлэн бүр мөсөн хаасан. Харин эмнэлгийн үйл ажиллагааг шалгалтаар илэрсэн зөрчил дутагдлыг бүрэн арилгах хүртэл хугацаагаар түр зогсоохоор шийдвэрлэсэн аж. Яагаад гэхээр тус эмнэлгийнхэн бүрэн бус техник хэрэгсэл болон зөвшөөрөлгүй хэрэгслээр үзлэг оношилгоо хийж, иргэдийг хохироож байжээ. Тиймээс өнгөрөгч аравдугаар сард мэс заслын үйл ажиллагааг түр зогсоож, хугацаатай үүрэг өгсөн бөгөөд энэ сарын 17-ны өдөр дахин шалгасан юм. Ийнхүү тус эмнэлгийн удирдлагуудыг байлцуулан шалгахад албан шаардлагын хэрэгжилт  хангалтгүй, үүрэг даалгаврыг хэрэгжүүлэх ажлын төлөвлөгөөг ирэх оны нэгдүгээр улиралд гүйцэтгэхээр төлөвлөж, хугацаат үүрэг даалгаврыг хэрэгжүүлэх талаар дорвитой арга хэмжээ аваагүй байна гэсэн дүгнэлт гарчээ. Өнгөрөгч сар гаруйн хугацаанд ч тэд үйл ажиллагаагаа нууц хэлбэрт явуулж байсан тухай үйлчлүүлэгчдийн гомдол ч байгаа юм. Мөн шалгалтаар “Ионсей” эмнэлэгт хэд хэдэн зөрчил илэрсэн учраас Мэс заслынх нь үйл ажиллагааг бүр мөсөн хаажээ. Тэгэхээр өнгөрөгч хугацаанд иргэдээс өндөр төлбөр авч стандарт хангаагүй, хууль бус үйлчилгээ явуулж байсан тус эмнэлгээс үйлчлүүлсэн хүмүүс нөхөн талбар авмаар юм. Дээр дурдсан зөрчлөөс дурдвал:

1.Дурангийн мэс заслын тусламж үйлчилгээний стандарт, удирдамж батлуулах, эмнэлзүйн туршилт явуулах зөвшөөрлийг Эрүүл мэндийн асуудал эрхэлсэн төрийн захиргааны төв байгууллага болон анагаах ухааны ёс зүйн хороонд хандаж аваагүй

2.Дурангийн багажийг угааж халдваргүйтгэх, ариутгахдаа тусдаа өрөө буюу ариун бүсэд угааж, ариутгадаггүй

3.Тоног төхөөрөмжийн шинэчлэл хийгээгүй

4.Хангамж хүрэлцээгүй, орон тооны инженер, техникчгүй

5.Мэс заслын тусламжийг үзүүлэхтэй холбогдуулан мэс засалд бэлтгэсэн байдал, мэс заслын явц, өвчтөнг эрчимт эмчилгээ, мэдээгүйжүүлгийн эмчийн, мэс засалчийн болон хүүхдийн эмчийн хяналтгүй орхисон зэрэг дээрх зөрчлүүд илэрсэн байна.