Шинэчлэлийн Засгийн газар, ЭМЯ-наас эрүүл мэндийн салбарын суурь шинэчлэлийн жилд хөдөөгийн хүн амд орон нутагтаа чанартай, аюулгүй оношилгоо, эмчилгээг хийлгэх боломжийг бүрдүүлэх үүднээс эхний ээлжинд 11 аймгийг оношилгооны төвтэй болгох зорилт тавьсан. Үүний нэг нь Сэлэнгэ аймаг юм.

Тус аймгаас жилд дунджаар 1500-1800 орчим хүн 13/А маягтаар Улаанбаатар хот руу онош тодруулахаар ирдэг бөгөөд эдгээрээс 600-700 орчим хүн зайлшгүй шаардлагаар гурав дахь шатлалын лавлагаа төвүүдэд эмчлэгддэг байна.

Тэгвэл иргэд аймагтаа оношлогоо, эмчилгээ хийлгэх бүрэн боломж бүрдэж, аймгийн нэгдсэн эмнэлгийн нэг болон хоёрдугаар давхарыг оношилгооны төвийн зориулалтаар тохижуулан засварлаж, 20 нэр төрлийн зургаан багцын 1.2 тэрбум төгрөгийн эмчилгээ, оношилгооны тоног төхөөрөмжүүдийг суурилуулан энэ сарын 17-ны өдөр “Оношилгооны төв”-ийн нээлтийг хийлээ.