Эрүүл мэндийн дэд сайд Ж.Амарсанаа АНУ-д олон улсын хуралд оролцоод иржээ. Дэд сайд үндсэн ажлынхаа хажуугаар ард түмэнд тустай чухал ажил амжуулаад ирсэн байна. Тэрбээр элэгний С вирусийн эмийг монголдоо хямд үнээр худалдан авч хэрэглэх тухай ярилцаж тохиролцоод ирсэн байна.

2007 онд Монголд хийсэн судалгаагаар нийт хүн амын 15 хувь нь элэгний С вирустэй гэж гарчээ. Үүнээс үүдэлтэй элэгний хорт хавдар нь нас баралтын шалтгааны хоёрт бичигддэг байна. Харин АНУ-д элэгний С вирус устгадаг шинэ эмийг эмчилгээнд ашиглаж эхэлжээ. Энэхүү эмийг тус улсын Эм хүнсний агентлаг өнгөрсөн оны сүүлчээр баталж, зах зээлд гаргах зөвшөөрөл өгсөн байна.

АНУ-д “Sofosbuvir” гэдэг эмийн зургаан сарын курс эмчилгээний өртөг 84 мянган ам.доллар байхаар зах зээлд нийлүүлэгдэх юм байна. Манай улсын иргэдийн хувьд энэ эмийн өртөг харьцангуй өндөр тул Эрүүл мэндийн дэд сайд Ж.Амарсанаа  “Gilead” эмийн компанийг зориуд зорьж очжээ.

Улмаар Монголд С вирусийн өвчлөл өндөр байдаг талаар “Gilеad” компанийнханд танилцуулж, хямд үнэ өртгөөр нийлүүлэх боломжийг судалж үзэхийг хүссэн байна. Түүний үр дүнд манай улсад С вирусийг устгах курс эмчилгээний зардлыг 1800 ам.доллараар тооцохоор ярилцаж тохирчээ. Энэ нь тэндэхийн үнэ ханшаас 44 дахин бага өртөг аж.

“Одоо энэ эмийг Монгол Улсад хэрэглэх эмийн жагсаалтад бүртгэж баталгаажуулах ёстой. Үүнийг түргэвчилсэн байдлаар хоёр сарын дотор амжуулж болох байх гэж найдаж байна. Мөн хагалгаа, мэс ажилбарт ашигладаг багаж хэрэгсэл улам боловсронгуй болж байна. Дээр нь дэлхийн стандартад нийцсэн, хамгийн сүүлийн үеийн технологиор хийсэн эмтэй болчихлоо. Энэ бүхнээс үзэхэд 10 жилийн дараа манай улсад С вирус гэгч өвчин “домог” болно гэдэгт итгэлтэй байна” гэж Эрүүл мэндийн дэд сайд Ж.Амарсанаа хэлэв.