Томчууд нь үл тоосон ҮЗХ

 

        АН-ын ҮЗХ-ны хурал товлосон хугацаанаасаа хоёр цагаар хоцорч эхэллээ. Энэ оны сонгуулиас хойш таван ч удаа тов зарлаад хуралдаж чадаагүй ҮЗХ-ны хуралдааныг 15.00 цагт зарласан ч ирц бүрдэхгүй байсаар 17.00 цагийн орчимд өмнөх хуралдааны ирцээр эхлүүлсэн.

 

Учир нь, АН-ынханд энэ удаагийн хурлыг хойшлуулах цаг байхгүй бөгөөд ирэх сарын 6-нд намынхаа их хурлыг хуралдуулахаар товлоод байгаа. Ийнхүү удаан хүлээлгэсэн ҮЗХ-г эхлүүлсэн ч шийдвэр гаргах төвшний лидергүй шахуу эхлүүлэв. Өөрөөр хэлбэл, энэ намын томчууд буюу засгийн эрх барьж байхад тэргүүн эгнээнд явсан хүмүүсээс нэг нь ч ирсэнгүй. Тухайлбал, АН-ын дарга асан З.Энхболд БНСУ-д эхнэрээ эмчлүүлэхээр явсан С.Баярцогт, Ч.Сайханбилэг нар ямар нэгэн тайлбар хийгээгүй бөгөөд хуралдаа ирсэнгүй. Гэхдээ С.Баярцогтын хувьд АНУ-д суралцаж байгаа гэх мэдээлэл бий. Харин Н.Алтанхуяг, Х.Баттулга нар ҮЗХны хуралд суух боломжгүй гэдгээ хэлсэн байна.

 

Ийнхүү лидергүй хуралдаанаар хоёр асуудлыг хэлэлцэнэ. Тодруулбал, ирэх сард болох намын их хуралд бэлтгэх ажлын хэсэг, намын дүрэмд өөрчлөлт оруулах ажлын хэсгийг байгуулах асуудлыг хэлэлцэх юм байна. Түүнчлэн хуралдаанаар намын даргын асуудлыг хэлэлцэхгүй. Ямартай ч намын даргыг сонгох их сунгааны өмнөх ҮЗХ-ны хуралдаанд томчууд нь төдийлөн ач холбогдол өгсөнгүй. Харин хуралдаа ирсэн зарим гишүүний байр сууриас хүргэхэд УИХын гишүүн асан Р.Амаржаргал намын даргад ч Ерөнхийлөгчид ч нэр дэвшихгүйгээ илэрхийлсэн. Түүнчлэн тэрбээр “Намын ҮЗХ-г шинэчлэх шаардлага байна. Яг манай өнөөгийн дүрэмд ийм зохицуулалт байхгүй учраас бүх насаар нь дархалчихсан юм шиг ҮЗХ-ны гишүүд байна. Өнөөдөр АН-д тулгамдаад байгаа асуудал нь дотоод ардчилал. Намын дарга, удирдлагуудыг сонгох процесс нь дотоод ардчилалтай болж чадах уу гэдэг нь чухал. Тиймээс нийт гишүүдийн дунд сунгаа зохион байгуулаад, гишүүдээс нь намын даргыг сонгох нь зөв гэж бодож байгаа.

 

Өнөөдрийн ҮЗХ-ны хурлаар намын дүрмийг шинэчлэн хэлэлцээд, нэг хувилбар гаргаж ирээд түүнийгээ нийт гишүүдээрээ хэлэлцүүлэх шийдвэр гаргавал өнөөдрийн ҮЗХ үүргээ биелүүлнэ. Би намын дарга болон Ерөнхийлөгчийн сонгуульд нэр дэвшихгүй. Дэвших сонирхолтой олон хүн бий. Тиймээс намын даргын шалгуурыг тавьж өгөх хэрэгтэй” гэлээ. Харин намын ерөнхий нарийн бичгийн даргын үүрэг гүйцэтгэгч Л.Эрхэмбаяр Н.Алтанхуягийн ЗГ-ыг огцруулсан хүмүүст хариуцлага тооцох шаардлагагүй гэж үзсэнийг онцолсон. Тэрбээр “Энэ удаагийн ҮЗХ-ны хуралдаан өнгөрсөн наймдугаар сард хуралдсан 49 дүгээр ээлжит бус хуралдааны үргэлжлэл учраас өмнөх ирцээрээ хуралдана. Энэ удаад ирэх сарын 6-нд болох намын Их хурлыг зохион байгуулах ажлын хэсгийг томилно. Их хурлаараа намын Үндсэн дүрмийг шинэчлэн батална. Дүрмийн төслийг боловсруулах ажлын хэсгийг өнөөдөр байгуулна. АН-ын даргаа ҮЗХ-ноос болон Их хурлаасаа сонгодог. Энэ удаад олонх гишүүд нийт намынхаа гишүүдийн дундаас сунгаагаар намын даргаа сонгох нь зүйтэй гэсэн байр суурьтай байна.

 

Намын үндсэн дүрмийн тав, зургаан төсөл байгаа. Энэ хурлаар эдгээр төслөө нэгтгээд Их хуралдаа нэг төсөл оруулна” гэсэн.

 

М.Өнөрөө

 

 

  • Манай сайт таалагдсан бол лайк дараарай

АНХААРУУЛГА: Уншигчдын бичсэн сэтгэгдэлд unen.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй. 

Сэтгэгдэл (1)

  • Зочин (202.9.40.237)

    2016-11-17

    Ардчилсан нам Монголын төрийн жолоог атгах тоолондоо самардаг тийм л нам. АН-ын дотоод зөрчил тогооноосоо хальж байгааг монголчууд харж л сууна. Фракцууд нь учраа олохоо байж, сандал ширээний төлөө нүдээ ухаж өгөхөөс ч сийхгүй тийм л хүмүүс. Гадаадын хөрөнгө оруулагчид АН-ыг засаг толгойлохоор зугтаагаад явчихдаг. Улсынхаа эдийн засгийг траншейны нүх рүү унагачихаад хээвнэг худал зална. Мөн ч ичих нүүргүй улсууд шүү дээ, АН-ынхан. Тэдний ингэж гунигт дуу аялах нь аргагүй юм. Тэд Монгол улсыг барьцаанд тавиад асар их зээл авчихсан хүмүүс шүү дээ. Монголын толгой эдийн засагчид байтугай олон улсын шинжээчид ч өнөөдрийн эрх баригчдын эл үйлдлийг толгойгоо гашилтал бодоод ч ойлгоогүй. Тухайн үед эх орноо барьцаанд тавьж бонд босгох ямар ч шаардлага байгаагүй гэдгийг захын эдийн засагч хэлээд өгнө. Эрх баригчид босгосон бондын мөнгөнөөсөө ард түмэнд хэдийг илүүчилсэн бэ. Тэд илүүчлэх нь байтугай өөрийн хүнээсээ нуугаад өөрсдөө идэж уугаад дуусгасан нь бодит үнэн. Хэдэн зуун саяар биш хэдэн тэрбумаар идэж байгаа эрх баригчдын эсрэг дуугарсан нь бурууддаг болсон цаг юм. АН-ынхан бондын мөнгөөр үхмэл цэцэг тарьж, хогийн ногоон уут тарааж, хэдэн зам зассан болсон. Ард түмэнд наалдсан юм үнэндээ л харагдахгүй байгаа нь чин үнэн. Эсрэгээрээ ард түмний амьдрал өдрөөс өдөрт доройтож байгаа нь ч үнэн. Бондын мөнгөөр дураараа дургисан эрх баригчид дансаа улайлгачихаад төрийн албан хаагчдын халаас руу өнгийж байгаа нь ч үнэн. Эрх баригчдын луйвар арай цагаандаа гарч байгаа юм биш үү. Тэд одоо гунигт дуу аялаад ч газар авахаа больсон. Ард түмэн тэдэнд итгэсэндээ харамсч суугаа. Нарийндаа бол АН арчаагүйдээ Монгол улсыг өнөөдрийн ийм байдалд хүргэчихээд байгаа юм. Тэдэнд улс аваад явчих бодлого алга. Улс байтугай намаа аваад явчих бодлогогүй хүмүүс төрийн жолоод гарсны горыг монголчууд амсаж байна. Өөрийн алдааг өрөөлөөс битгий хай, АН-ынхаан. Эхлээд нам доторхи фракцынхаа учрийг олчих. Дараа нь улсаа авч явах туйха яривал чихэнд чимэгтэй сонсогдоно.