Саяхан чухал хэрэгтэй санааг фэйсбүүк хуудаснаас олж уншлаа. Нэгэн ээж “Монголд үйл ажиллагаа явуулж байгаа бүх банк ариун цэврийн өрөөтэй болмоор юм. Хүүтэйгээ хамт банк ороод дугаараа хүлээж байх зуур ариун цэврийн өрөөндөө гаднын хүн оруулахгүй гээд хамгаалагч хэлж байх хооронд хоёр настай хүү минь гарч тэсэлгүй өмдөндөө шээчихлээ. Хүү минь ичээд явъя гээд зөндөө уйллаа” хэмээн фэйсбүүк хуудастаа уцаарлангүй бичсэн нь нэлээд олон хандалт авсан байх юм. Үнэндээ энэ бол Улаанбаатарын хөндөх ёстой асуудлын нэг. Иргэдэд зориулсан нийтийн ариун цэврийн байгууламж нийслэл хотод хүрэлцээ муутай.

Ихэнх нь хаалгаа барьсан, түгжээтэй байдаг болжээ. Түүнчлэн байгууллагууд ариун цэврийн өрөөгөө үйлчлүүлэгчдээ ашиглуулдаггүй. “Мөнгийг нь төлөөд ч болтугай хүүхдээ бие засуулья” гэж гуйж байх олон эцэг, эхийг харж л байсан. Ялангуяа иргэд олноор үйлчлүүлдэг байгууллага, худалдааны төвүүд ариун цэврийн өрөөгөө түгжилгүй иргэдэд нээлттэй ажиллуулах ёстойг энэ мэт жишээ бидэнд харуулж байна. Аялал жуулчлалын улирал эхэлсэн өдийд нийслэл хотын шийдэх ёстой асуудлын нэг нь ариун цэврийн байгууламж гэдгийг холбогдох албаныхан анхаарууштай. Түүнчлэн нийтийн бие засах газрын хүрэлцээ муу энэ үед олон нийт ихээр үйлчлүүлдэг банк, худалдааны төвүүд ариун цэврийн өрөөгөө түгжих бус нээж ашиглуулах нь зөв зүйтэй гэдгийг энэ мэт санал сэтгэгдэл хэлж байгаа юм.

Г.НЯМСҮРЭН