Европын хөлбөмбөгийн Аваргуудын лигийн шигшээ тоглолтод Германы “Байерн Мюнхен” клуб, Английн “Челси” багтай өрсөлдөхөөр боллоо. Урд шөнө нь болсон тоглолтод Лондонгийн “Челси” клуб өнгөрсөн жилийн аварга “Барселона”-г буулган авсан бол өнгөрсөн шөнө “Байерн Мюнхен” Испанийн алдарт “Реал Мадрид”-ыг хожлоо. Ингэснээр Испанийн хөлбөмбөгийн супер хоёр баг хагас шигшээ шатнаас Аваргуудын лигийг орхилоо. Өнгөрсөн долоо хоногт Германд болсон тоглолтод “Реал” 2:1 харьцаатай хожигдсон. Харин өнгөрсөн шөнө өөрийн талбай болох “Сантьяго Бернабеу”-даа 2:1-ээр хожсон. “Реал”-ын лидер Криштиан Рональду дубль /6`, 14`/ хийн, тоглолтын хувь заяаг өөрийн талд эргүүлээд байсан ч ахмад тоглогч Арьен Роббен 27 дахь минутад тооны харьцааг 2:1 болгосон. Ингээд тоглолтын үндсэн цаг өндөрлөтөл дахин гоол ороогүй. Эцэст нь хоёр тоглолтын нийлбэрээр “Реал”, “Байерн”-ийн тоглолт 3:3 харьцаатай өндөрлөж, торгуулийн цохилтоор ялагчийг тодруулах болсон юм. Швайнштайгер багаа шигшээд шалгарах хариуцлагатай гоолыг оруулсан бол Нойер “Реал”-ын эхний хоёр цохилтыг хааснаар багтаа давуу байдал авчирсан юм. Эзэн хааны багийн шилдгүүд болох Рональду, Кака нарын цохилтыг хаасан. Өнгөрсөн шөнийн тоглолтод торгуулийн цохилтод “Реал Мадрид”-аас Алонсо ганцаараа даалгавраа амжилттай биелүүлсэн бол “Баейрн”-аас Тони Кроос, Филипп Ламм нар алдаж, харин эцсийн мөчид хагас хамгаалагч Бастьян Швайнштайгер гоолдсоноор 3:1 харьцаатайгаар Германы багийн ялалтаар өндөрлөлөө. Тавдугаар сарын 19-нд “Байерн” өөрийнхээ талбай “Альянц Арена”-даа Английн “Челси” клубыг хүлээн авч, Аваргуудын лигийн аваргын төлөө өрсөлдөх эрхээ авч чадлаа