Арлын Японд төдийгүй, дэлхийд алдраа гайхуулсан Асашёорюү Д.Дагвадорж элдэв янзын баяр наадамд тун дургүй. Тэрбээр “Монголын олон баяр яасан дуусдаггүй юм бэ, үргэлж баярлах нь сайны тэмдэг яавч биш шүү” хэмээн дотны найздаа ярьжээ. Баярт “харшилтай” аварга маань үндэснийхээ их баяр наадмыг тэсэн ядан хүлээдэг гэнэ. 

“Өнөөдөр улсын баяр наадмын өдөр гэхээр л өөрийн эрхгүй нулимс гарах юм. Зодог тайлахаас өмнө долдугаар сарын башё эхэлчихдэг байлаа. Би 17 наснаасаа хойш монгол үндэснийхээ баяр наадмыг эх орондоо үзээгүй. Харин сүүлийн хоёр жил тун ч сайхан наадлаа. 

Мэргэжлийн сумогийн дэвжээнд 25 дахь түрүүгээ авч зодгоо тайлахдаа энэ зун эх орондоо сайхан наадах нь дээ гэж бодохоор л дээшээ нэг юм огшоод ирсэн” хэмээн сэтгэлээ дэлгэжээ.