Африк тивийн баруун захад орших Либери улсын экс Ерөнхийлөгч Чарльз Тэйлорт Олон улсын эрүүгийн шүүх (ОУЭШ)-ээс 50 жилийн хорих ял оноолоо.

Түүнийг 1991-2002 оны хооронд хөрш Сьерра-Леонд болсон иргэний дайныг дэгдээгч босогчдод тусламж үзүүлэн, тэдний хүчирхийллийг өөгшүүлж, уриалан дуудсан хэмээн буруутгажээ.

“Эл дайны үеэр 50 мянга гаруй хүн амь үрэгдсэн ч дайны үеэр үйлдсэн босогчдын харгислал одоо хүртэл иргэдийн санаа бодлоос арилаагүй” гэж Нидерландын Гаага хотод болсон шүүх хуралд оролцсон Сьерра-Леоны төлөөлөгч мэдэгджээ. Харин амьдралынхаа үлдсэн хугацааг торны ард өнгөрүүлэх болоод байгаа 64 настай экс Ерөнхийлөгч Ч.Тэйлор өөрийгөө гэм буруугүй гэж мэдэгдсээр байгаа аж. 

ОУЭШ-ийн прокурор түүнд 80 жилийн хорих ял төлөвлөсөн ч ийнхүү 50 болгон бууруулжээ. Харин түүний ялыг Британид эдлүүлж магадгүй байна. Ч.Тэйлор 1997 онд Либерийн Ерөнхийлөгчөөр сонгогдож, 2003 онд огцорчээ. Үүнийхээ дараа тэрбээр Нигер рүү зугтсан ч удалгүй баригдсан юм.