АНУ-ын анхны өнгөт арьст Ерөнхийлөгч Барак Обама ирэх арваннэгдүгээр сарын 6-нд эхлэх Ерөнхийлөгчийн сонгуульд өрсөлдөхөөр болсон билээ. О.Обама энэ удаагийн сонгуульд ялалт байгуулбал хоёр дахь удаагаа энэ албыг хаших юм. Ирэх Ерөнхийлөгчийн сонгуультай холбогдуулан АНУ-ын “Pew Research Center” судалгааны байгууллага 44 дэх Ерөнхийлөгчийн чансаа ямар байгааг тогтоосон байна. Судалгааны төв Б.Обама олон улсын иргэдийн дунд хэр “ам сайтай” байгааг тогтоох дэлхий нийтийн хандлага төсөл /Global Attitudes Project/ хэрэгжүүлсэн бөгөөд уг төслийнхөө дүнг “Би Би Си”-д мэдээлсэн байна. 

“Би Би Си”-д нийтэлснээр дэлхий нийтийн хандлага төслийг 21 оронд явуулжээ. Судалгаагаар Хятад дахь Б.Обамаг дэмжигч иргэд 57-гоос 27 хувь болтлоо буурчээ. Бусад 20 оронд ч Б.Обамаг дэмжигч иргэдийн тоо буурсан байна. Гэхдээ Хятад шиг ийм том уналт ажиглагдаагүй байна. 2008 оны Ерөнхийлөгчийн сонгуульд нэр дэвших үеэс Б.Обамаг дэмжигчид дэлхий дахинд бий болжээ. 

Гэсэн ч түүнийг алба хаших хугацаанд авч хэрэгжүүлсэн гадаад бодлого нь тэдний ихэнхэд таалагдаагүй байна. Судалгаанд хамрагдсан орнуудын дийлэнх нь АНУ-ын агаарын дайралтыг эсэргүүцсэн гэнэ. Б.Обамагийн гадаад бодлого дэлхий дахинд шүүмжлэл дагуулж буй энэ үед АНУ-ын судалгааны өөр байгууллагуудын дүнгээр Ерөнхийлөгчийн чансаа өрсөлдөгч Митт Ромнитой тун ойрхон байгааг харуулжээ. 

Өөрөөр хэлбэл Б.Обама АНУ-д ч дэмжигчдийнхээ багагүй хувийг алдсан байна. Гадаад бодлого АНУ-ын Ерөнхийлөгчийн сонгуульд их үүрэг гүйцэтгэдэг гэнэ. Экс Ерөнхийлөгч Жорж Буштай адил Бүгд найрамдах намын гишүүн Митт Ромни “Ардчилсан намын Б.Обамаг Ж.Бушийн бодлогыг үргэлжлүүлэгч хулчгар. 

ОХУ бол АНУ-ын ¹1 дайсан” гэж мэдэгдэж байсан юм. Ардчилсан намыг бодвол харьцангуй дайнч бодлого баримталдаг Бүгд найрамдах намын гишүүн Ж.Бушийн үед АНУ Ирак, Афганистан зэрэг Ойрхи Дорнодын орнуудад цөмрөн орох НАТОгийн цэргийн ажиллагааг тэргүүлж оролцсон юм. Харин Б.Обамагийн үед Ливид довтлох олон улсын эвслийн цэргийн ажиллагааг Франц толгойлсон. 

Түүнчлэн Иран, Сири, Хойд Солонгосын асуудалд хэт буулт хийсэн, ОХУ-ыг харзнасан бодлого хэрэгжүүлж байна гэж Ойрхи Дорнод болон Азийн орнуудын иргэд Б.Обамаг шүүмжилжээ. Хэдийгээр Ливан, Тунис, Иордан, Египет зэрэг Ойрхи Дорнод, Хятад, Япон, Өмнөд Солонгос зэрэг Азийн оронд Б.Обамаг дэмжигчдийн тоо эрс буурсан ч Европ ялангуяа АНУ-ын холбоотон баруун Европын орнуудад Б.Обамаг дэмжигч иргэдийн тоо бараг унаагүй байна. 

Өөрөөр хэлбэл 2009 онд Европын таван оронд Б.Обамаг дэмжигчид 78 хувьтай байв. Харин 2012 онд 63 хувь болсон байна. Мөн Ойрхи Дорнодын лалын шашинт таван оронд 2009 онд Б.Обамаг дэмжигчид 34 хувь байв. Харин энэ онд 15 хувь болж буурчээ. 

Түүнчлэн ОХУ-д 40 хувь байсан үзүүлэлт 18 хувиар буурч, 22 болсон аж. Энэ нь түүний ирэх сонгуульд багагүй нөлөөлөх нь дамжиггүй. Үүнээс өмнө олон улсын шинжээчид АНУ-ын анхны африк гаралтай Ерөнхийлөгчийг дахин сонгогдох магадлал хомс байгааг нэг бус удаа дуулгаж байсан юм.