Олон улсын эрүүгийн шүүх (ОУЭШ) өнгөрөгч 11-ний өдөр Конгын цэргийн дарангуйлагч Томас Лубангад 30 жилийн хорих ял оноолоо. 

Олон улсын прокурорууд түүнийг 2002-2003 онд хүүхдүүдийг олноор нь цэрэгт элсүүлж, насанд хүрээгүйчүүдийн армиа бусармаг үйлдэлд ашигласан болохыг тогтоожээ. Тухайн үед Бүгд найрамдах ардчилсан Конго Улсын зүүн хойд нутаг Итурид үндэстэн хоорондын зөрчил оргилдоо хүрсэн байжээ. 

Харин Т.Лубанга мөргөлдөөнд оролцогч босогчдын нэг бүлгийг толгойлж байсан байна. ОУЭШ-ийн ерөнхий прокурор Луис Морено-Окампо “Итури бүс нутгийн ард иргэд болон элсүүлсэн хүүхэд бүрийн нэрийн өмнөөс энэ ялыг оногдуулсан. Т.Лубанга тэдгээр хүүхдэд алж, хүчиндэхийг зааж өгсөн. 

Энэ нь тэдгээр хүүхдийн хойшдын хүмүүжилд сөргөөр нөлөөлнө” гэж хэлжээ. “Ассошейтэд Пресс” агентлагийн мэдээлснээр ОУЭШ Т.Лубангаг хүүхдүүд болон Итуригийн ард иргэдээс уучлалт гуйвал ялыг 10 жилээр хөнгөлж, 20 жилийн хорих ял оноохоо илэрхийлжээ. Харин Т.Лубанга өөрийгөө ямар ч гэм буруугүй гэсэн байна. 

Хүний эрхийн “Watch” байгууллагын тооцоолсноор Итурид Хема, Ленду үндэстний босогчдын мөргөлдөөнд 60 мянга гаруй хүн амь үрэгджээ. Хема үндэстний Конгын эх орончдын холбоо бүлгийн удирдагч Томас Лубанга 15-аас доош насны хөвгүүдийг хүртэл цэрэгт дайчилж, фронтын шугам уруу илгээжээ. Тэрбээр 2005 оны гуравдугаар сард нийслэл Киншасагаас баривчлагдсан бөгөөд 2006 оноос хойш Гаагад шүүгджээ.