Америк эмэгтэйчүүдийг төлөөлөн анх сансарт ниссэн хатагтай Салли Кристен Райд 61 насандаа Калифорни мужийн Сан-Диего хотноо таалал төгссөн тухай НАСА-гийн албанаас мэдээлжээ.
 Эмэгтэй нисгэгч Райд анх 1983 онд “Челленжер STS-7” багийн бүрэлдэхүүнд багтаж огторгуйн аянд гарсан бөгөөд дэлхийн түүхийн хуудаснаа сансарт ниссэн гурав дахь эмэгтэй нисгэгч болон тэмдэглэгдсэн билээ.
Түүнээс өмнө Зөвлөлтийн эмэгтэй сансрын нисгэгч Валентина Терешкова /1963/, Светлана Савицкая /1982/ нар огторгуйн уудамд мөрөө гаргаж байжээ.
Салли Райд сансрын уудмыг зорьсон хоёр дахь нислэгээ 1984 онд мөн л “Челленжер” хөлгийн хамт үйлдсэн юм. Тэрбээр сансар огторгуйд нийт 343 цагийг өнгөрүүлсэн аж.
Райд нисгэгчийн карьераа дуусгасны дараа Вашингтон хот дахь НАСА-гийн төв штабт хэсэг хугацаагаар ажиллаж байжээ. Түүнээс гадна тэрбээр хүүхдүүдэд зориулсан сансрын тухай цуврал номын зохиогч гэдгээрээ олонд танигдсан юм.