Лондонгийн олимпод медаль хүртсэн тамирчдадаа мөнгөн урамшуулал олгохоор боллоо. Мөн Олимпийн наадам, Дэлхийн аваргаас медаль хүртсэн тамирчдад насан туршид нь сар бүр урамшуулал олгох тухай Ерөнхийлөгчийн зарлигийн төслийг энэхүү хуралдаанаар хэлэлцээд дэмжлээ. Ерөнхийлөгчийн зарлигийн төсөлд Олимпийн наадмаас алтан медаль хүртсэн бол 3 сая, мөнгө бол 2, хүрэл бол 1 сая төгрөг, Дэлхийн аваргын алтан медалийн эзэнд 2 сая, мөнгө медальтанд 1, хүрэл медаль хүртсэн тамирчинд  500 мянган төгрөг өгч байхаар тусгажээ. Засгийн газрын хуралдаанаар энэ төслийг хэлэлцээд Олимпийн наадмын алтан медальтныг сар бүр 4 сая, мөнгөн медальтныг 3, хүрэл медальтныг 2 сая төгрөгөөр урамшуулах саналыг уламжлахаар болсон юм. Олимп, Дэлхийн аварга шалгаруулах тэмцээнээс медаль хүртсэн үе үеийн тамирчид дээрх урамшууллыг ирэх оны 01 дүгээр сарын 01-нээс авч эхэлнэ. Өнөөдрийн байдлаар манай улсын 47 тамирчин Олимп, Дэлхийн аварга шалгаруулах тэмцээнээс медаль хүртээд байна. Лондонгийн Олимпийн медальт тамирчдаа хүлээж авах ёслолын ажиллагаа яг одоо 13.40 цагт Сүхбаатарын талбайд болно. Дараа нь тамирчдад Засгийн газрын мөнгөн шагнал гардуулах болон Ерөнхийлөгчийн зарлиг сонордуулах ажиллагаа Төрийн ордны Баганат танхимд болох юм. Энэ арга хэмжээнд Ерөнхийлөгч, УИХ-ын дарга, Ерөнхий сайд нар оролцох юм.