Японы мэргэжлийн сумо бөхийн аки башёгийн 13 дахь өдрийн барилдаан өчигдар өндөрлөж, озэки Харумафүжи Д.Бямбадорж озэки Кисэносатог ёрикири мэхээр давснаар 13 дахь даваагаа авсан юм. Тэрбээр ийнхүү Сумогийн холбооны дэргэхэд Ёкозунагийн зөвлөлийн 13 ба түүнээс дээш даваа авбал ёкозуна цол хүртээх тухай болзлыг биелүүлж байгаа юм. Гэхдээ башёгийн явцад Котоошю, Баруто, Котошогикү нарын озэки цолтнууд гэмтлийн улмаас башёг орхисон тул өрсөлдөөн суларсан гэх шалтгаанаар ёкозуна цол хүртээх болзлыг 14 даваа болгон ахиулсан билээ. Харумафүжи Д.Бямбадорж башёгийн 14 дэх өдрийн барилдаанд озэки Какурюү М.Анандтай барилдана. Харин сүүлийн өдөр их аварга Хакухотой барилдах учиртай юм.