Ираны Ерөнхийлөгч Махмуд Ахмадинежад “Дэлхийн III дайныг Израиль эхлүүлнэ. Тус улс манай улсад халдвал олон орныг хамарсан дайн эхэлнэ” гэж мэдэгдлээ. Үүнээс өмнө тэрбээр “Израилийг цөмийн байгууламжуудад нь агаараас цохилт өгвөл хариуг нь барина” гэж мэдэгдэж байсан юм. Израилийн эрх баригчдаас Иранд ирэх заналхийлэл өдөр ирэх тусам нэмэгдэж байна. Тус улс Ираныг цөмийн зэвсэгтэй болоход зургаан сарын хугацаа үлдсэнийг олон улсын хамтын нийгэмлэгийн орнуудад сануулж, АНУ дэмжихийг хүссэн.
Харин АНУ-ын Ерөнхийлөгч Барак Обама ирэх сонгуультай холбогдуулан эрсдэлтэй алхам хийхээс татгалзсаар байна. Саяхан Израилийн Ерөнхий сайд Биньямин Нетаньяху Иранд цохилт өгөхийг яаравчлан Барак Обамаг шахамдуулахаар Вашингтонд айлчлах үеэр Б.Обама түүнийг хүлээн авч уулзахаас татгалзсан юм. Юутай ч Израиль, Иран ирэх дайнд бэлтгэсээр байна.