АНУ-ын баруун хойд зүгийн муж Орегоны 70 настай нэгэн эр гахайнд бариулж, амь насаа алдсан хэрэг гарчээ.
Терри В.Гарнер гэх тус фермэрч өнгөрөгч лхагва гарагийн өглөө гахайнуудаа хооллохоор явсан байна. Гэрийнхэн нь эргэж ирэхгүй удсанд ихэд гайхан араас нь очсон бөгөөд тэрээр гахайн саравчинд золгүйгээр амиа алдсан байжээ. Гахайнууд түүний биеийн цөөхөн хэсгийг үлдээж, юу ч үгүй барьсан байсан байна.
Цагдаагийнхан хэргийг нарийвчлан шалгаж байгаа бөгөөд зүрхний шигдээс өвчтэй байсан түүний биеийн байдал гэнэт муудан унаж, улмаар ямар нэгэн хариу үйлдэл үзүүлэлгүйгээр идүүлсэн байх хэмээн таамаглаж байгаа ажээ. Өмнө нь нэг гахай түүн рүү улангасан дайрч байсан тухай гэрчүүд мөн мэдүүлсэн байна.
Шинжээчид хэргийн газар ажиллаж, шалгалт хийсэн боловч, түүний цогцосноос үхлийн шалтгааныг тогтоох боломжгүй гэсэн хариу гарчээ.