Боливийн мөргөлчид нас барагсдын гэгээн дурсгалд зориулан үйлддэг шашны үйл “Гавлын ясны өдөр”-өө тэмдэглэлээ. Тэд нас барсан өвөг дээдэс, ойр дотны хүмүүс, найз нөхдийнхөө гавлын ясыг цуглуулж ийнхүү ёслол үйлддэг аж. Шашны тус үйлийг үйлдэгсэд хүний гавлын ясанд хэмжээлшгүй их хүч чадал, амжилт бүтээлийн од оршдог гэж үздэг бөгөөд нийслэл Ла Паз хотын оршуулгын газар 300 гаруй гавлын ясыг авчирдаг байна.
 Хайртай хүмүүсийнх нь гавлын яс өөрсдөд нь аз авчирна гэдэгт гүнээ итгэсэн мөргөлчид гавлын ясаа гоё сайхан амьд цэцэгсээр хучин чимэглэж, өөрсдийнх нь эдэлж хэрэглэх дуртай эд зүйлсийг нь өмнө нь тавьж, хувцас хэрэглэл тэргүүтнийг  өмсгөж, дуртай дууг нь сонсгож, чин сэтгэлээсээ залбирдаг гэнэ.
Хэдийгээр Католикийн сүмийнхэн уг үйлийг буруушаан, “Гавлын ясны өдөр”-ийг тэмдэглэх явдлыг болиулахыг оролдож байгаа боловч одоог хүртэл шашны уг үйлийг хүндэтгэн, үйлдэх хүмүүс байсаар байгаа тул уг шашны ёслолыг тэмдэглэгсдийн тоо цөөрөхгүй байгаа аж.


: