Гималай нурууны бэлд орших Мьянмар Улсын төвийн нутагт 6.8 магнитудын хүчтэй газар хөдөлж 12 хүн амь үрэгджээ. Түүнчлэн олон арван хүн газар хөдлөлтийн улмаас бэртэж гэмтэн харьяа нутгийн эмнэлгүүдэд хүргэгдсэн байна. Газар хөдлөлт тус улсад өнгөрөгч ням гаригийн өглөөний 07.42 цагт болсон байна. Энэ үеэр харьцангуй барилгажсан төвийн нутгийн оршин суугчид чичирхийллийг мэдэрч, орон сууцнаасаа гарснаар амь үлдэцгээсэн аж. Харин амиа алдсан 12 хүний зургаа нь газар хөдлөлтийн үеэр ажиллаж байсан уурхайчид байжээ.
   Мөн цөөнгүй хүн газар хөдлөлтийн дараа сураггүй алга болсон байна. Газар хөдлөлт 120 гаруй км үргэлжилж, хамгийн ихдээ 10 орчим км-ийн гүн хавцал үүсгэжээ. Үүнтэй зэрэгцэн төвийн нутгийн зарим хотод олон арван барилга байгууламж болон гүүр нурж сүйдсэн байна. Үүний дараа тус улсад дахин газар хөдөлж өмнөхөөс дутахааргүй хохирол учруулжээ. Албаныхны хэлснээр, хоёр дахь газар хөдлөлт 5.6 магнитудын хүчтэй байжээ.
   Тус улсад үүнээс өмнө буюу өнгөрөгч онд дээрхтэй адил томоохон хэмжээний нутгийг хамарсан хүчтэй газар хөдлөлт болж 70 гаруй хүн амь үрэгджээ. Мьянмар нь бусад тивийг бодвол газар хөдөлдөг харьцангуй бага тохиолддог Ази тив, тэр дундаа энэ тивийн төвд оршдог юм.