Баруун Африкийн орнуудын эдийн засгийн холбоо (ЭКОВАС)-ны удирдагчид Малийн хойд нутаг дахь хямралыг зохицуулахаар 3300 цэргийг жилийн хугацаатай илгээхээр боллоо.

   Баруун Африкийн орнуудын эдийн засгийн холбоо (ЭКОВАС)-ны удирдагчид Малийн хойд нутаг дахь хямралыг зохицуулахаар 3300 цэргийг жилийн хугацаатай илгээхээр боллоо. Мали нь Ливитэй ойролцоо оршдог бөгөөд Ливид Муаммар Каддафийн дэглэм нуран унасны дараа Малид эмх замбараагүй байдал үүсчээ. Учир нь Малийн туарег омгийнхон Ливийн дарангуйлагч агсан Муаммар Каддафиас санхүүждэг байсан аж.
Харин түүнийг амь үрэгдсэний дараа салан тусгаарлахаар тэмцэж, олон нийтийг хамарсан энэхүү ажиллагааг тэргүүлсэн байна. Тэд Малийн газар нутгийн гуравны хоёрыг хамарсан Азавад хэмээх улс байгуулснаа зарлажээ. Хэдийгээр Африкийн холбоо энэ асуудалд ихээхэн анхаарал хандуулж, хөрш орнуудаас нь цэрэг дайчилсан ч тодорхой амжилтад хүрээгүй юм. Малийн хэв даврагчдын өдүүлсэн эмх замбараагүй байдал тус улсаас гадна хөрш орон, цаашлаад бүс нутаг дахь тогтвортой байдалд заналхийлэх хэмжээнд хүртлээ өсчээ.
Тиймээс Африкийн тивийн баруун хэсгийн 15 орны төр, засгийн тэргүүн нар Малид цэргийн ажиллагаа явуулахаар боллоо. ЭКОВАС-ын тэргүүнээр Зааны ясан эргийн Ерөнхийлөгч Алассан Уаттара ажилладаг бөгөөд тэрбээр "Бид Малид 3300 цэрэг нэг жилийн хугацаатай илгээх шийдвэрт хүрлээ" гэж Нигерийн нийслэл Абужа дахь уулзалтын дараа хэлжээ.
Тэрбээр цааш нь, "Энэ шийдвэрийг НҮБ-ын Аюулгүйн зөвлөл нягтална. Хэрвээ зөвшөөрвөл энэ сарын сүүлээр юм уу ирэх сарын эхэнд цэргүүдийг Мали уруу илгээнэ" гэжээ. Үүнээс өмнө НҮБ-ын Аюулгүйн зөвлөл Малийн босогчдын бүлгүүдийг террорист байгууллагуудаас бүх харилцаагаа таслахыг уриалж байсан юм.