Беларусийн нийслэл Минск хотод өнгөрсөн долоо хоногт болсон самбо бөхийн дэлхийн аварга шалгаруулах тэмцээнд манай тамирчид амжилттай оролцжээ.

Беларусийн нийслэл Минск хотод өнгөрсөн долоо хоногт болсон самбо бөхийн дэлхийн аварга шалгаруулах тэмцээнд манай тамирчид амжилттай оролцжээ. Эрэгтэй, эмэгтэй болон байлдааны самбо бөхийн төрлөөр аваргаа тодруулсан эл тэмцээнд 64 орны хүчтэнүүд өрсөлдсөн байна.
Манай бөхчүүдээс эмэгтэйчүүдийн 56 кг-ын жинд хүч сорьсон жүдо бөхийн ОУХМ Д.Сумьяа Болгарын Калина Стефановаг ялж дэлхийн аварга цол хүртжээ.
Тэрбээр энэ онд жүдо бөхөөр "Лондон-2012" олимпийн наадмын татамид зодоглож, эх орондоо болсон "Чингис хаан" Дэлхийн цомын тэмцээнд түрүүлж, Олон улсын жүдогийн холбооны Гранпригээс анх удаа хүрэл медаль зүүсэн билээ. Мөн 60 кг-ын жинд өрсөлдсөн 2005 оны дэлхийн аварга Т.Баттөгс мөнгө, 52 кг-д С.Солонгогэрэл хүрэл медалиар энгэрээ мялаасан байна.