Сирийн хамгийн том хот Алеппо дахь эмнэлгийг Засгийн газрын онгоцууд бөмбөгдсөний улмаас 40 гаруй хүн /олонхи нь өвчтөн/ амь үрэгдсэн гэж "Си-Эн-Эн" Сирийн сөрөг хүчний төлөөлөгчдөөс эш татан мэдээллээ. Уг эмнэлэг Засгийн газрын мэдлийнх аж. Сөрөг хүчин Алеппо хотын ихэнх хэсэгт хяналтаа тогтоосон бөгөөд Засгийн газрын онгоцууд тэднийг бөмбөгдөх үеэр эмнэлэг өртжээ.
Энэ сарын 21 буюу өнгөрөгч лхагва гаригийн орой бөмбөгдөлтөд өртсөн Дар аль-Шифа эмнэлэг нь Алеппо хотын худалдааны дүүрэг дэх эрүүл мэндийн үйлчилгээний хамгийн том газар аж. Сөрөг хүчнийхэн эмнэлгийн гол хаалганы ойролцоох хүлээлгийн өрөө бөмбөгдөлтөд өртөж дэлбэрч байгааг дүрс бичлэгийн хальсанд буулгажээ.
Алеппо нь Сирийн нийслэл Дамаксаас баруун хойд зүгт 310 км-ийн зайд оршдог бөгөөд тус улсын эдийн засгийн төв нь юм. Үүний улмаас сөрөг хүчин, Засгийн газрын цэргүүдийн хоорондох тулаан уг хотод хамгийн ширүүн өрнөсөөр байна. Өнгөрөгч наймдугаар сард энэ хотын эмнэлгүүдийн нэг нь бөмбөгдөлтөд өртөж шатсан ч өвчтөн, эмч, ажилтнууд эсэн мэнд гарч байсан аж.
Өнгөрөгч оны гуравдугаар сард Сирид өрнөсөн Ерөнхийлөгч Башар аль-Ассадыг огцрохыг шаардсан эсэргүүцлийн жагсаал иргэний дайн болон хувирч, одоогийн байдлаар 37 мянга гаруй хүн амь үрэгдэж, олон зуун мянган хүн эх орноосоо дүрвээд байна.