Авлигын эсрэг олон улсын нэгдэл тодотголтой "Transparency International" байгууллага энэ оны авлигын жагсаалтаа гаргахад, Монгол Улс 94-т эрэмбэлэгдлээ.

   Авлигын эсрэг олон улсын нэгдэл тодотголтой "Transparency International" байгууллага энэ оны авлигын жагсаалтаа гаргахад, Монгол Улс 94-т эрэмбэлэгдлээ. "Corruption Perceptions Index 2012" хэмээх энэхүү жагсаалтад дэлхийн 176 орон багтсан бөгөөд Монгол Улс дунд зэргийн авлигатай орноор тодорсон байна. Жагсаалтыг Дани, Финланд, Шинэ-Зеланд, Швед Улс тэргүүлж хамгийн бага авлигатай орноор шалгарсан бол авлига, хээл хахууль газар авсан орноор Сомали, Хойд Солонгос, Афганистан, Судан тодорсон аж.
  Өөрөөр хэлбэл, Скандиновт авлига хамгийн бага, Африкт хамгийн их байна. Монгол Улс Бенин, Колумб, Жибути, Грек, Энэтхэг, Молдав, Сенегалын хамт 94 дүгээр байрт бичигдсэн хэдий ч эрэмбээрээ 100 дугаар байр эзэлсэн юм. "Transparency International" дэлхийн орнуудын авлигын индексийг 100-0 гэсэн оноогоор үнэлжээ.
  Харин Монгол Улс 36 оноо авсан байна. Дашрамд дурдахад, тэргүүн байр эзэлсэн Дани 90 оноо авсан бол сүүл мушгисан Сомали найман оноо авчээ. "Transparency International" энэ жагсаалтаа гаргахдаа улс орон тус бүрт 3-10 судалгаа ашигласан бол Монгол Улсын авлигын индексийг тогтооход долоон судалгаа ашигласан байна.