Энэтхэгийн Уттар-Прадеш мужийн Аллахабад хотод хинди шашинт олон сая мөргөлч томоохонд тооцогдох шашны баяраа тэмдэглэж эхэлсэн байна. “Кумбх Мела” хэмээх уг баярын эхний өдөр л гэхэд найман сая хүн оролцсон тооцоо гарчээ. Баяр дундаа орох үед энэ тоо хэд дахин өсдөг гэнэ.
Уг баяраар мөргөлчид Ганга, Жамна мөрний усанд биеэ угаах зан үйл хийдэг байна. Хачирхалтай нь энэ баяр 12 жилд нэг л удаа болдог бөгөөд энэтхэгчүүд ихээхэн ач холбогдол өгдөг юм. Баярын гол зан үйл усанд орохыг гай зовлонгоосоо салж, ариуслаа хэмээн үздэг байна. Өмнө буюу 2001 оны баярт 40 сая гаруй хүн оролцож нэгэн дээд амжилт болжээ.