Монголын паралимпийн холбооноос “Хөгжлийн бэрхшээлтэй, паралимпийн тамирчдын хурд, хүчний бэлтгэл” нэртэй ном гаргахаар болжээ. Бээжингийн олимпоор анхны аваргаа өлгийдөн авсан Монголын паралимпийн холбоо Лондоны олимпод ч чамлахааргүй амжилт үзүүлж Б.Урантунгалаг, Жавзмаа нар шагналт байрт шалгарсан. Мөн дэлхийн цом, олон улсын тэмцээн уралдаанаас найман медалийг эх орондоо авчирсан.
   Тиймээс тус холбоо өнгөрсөн оны амжилт, алдаа дутагдал, дараагийн тэмцээн уралдаандаа зориулж гарын авлага, ном бүтээхээр шийджээ. Энэхүү ном нь спортын мастер Д.Төмөр, Б.Батдорж нарын судалгааны материалаас бүрдэх аж. Уг номд хүний биеийн бүтэц болоод хөгжлийн бэрхшээлтэй иргэд хурд, хүчээ сайжруулахад ямар дасгал хөдөлгөөн хэрэгтэй, хэрхэн бэрхшээлийг туулж ялалтад хүрэх талаар дэлгэрэнгүй мэдээллийг агуулах юм.
    Паралимпийн холбооноос энэ жил олон улсын гурав, дэлхийн аварга шалгаруулах тэмцээн мөн өсвөрийн Ази тивийн аварга шалгаруулах тэмцээнд баг тамирчдаа оролцуулахаар төлөвлөөд байгаа ажээ.