Малийн хойд хэсгийг хяналтдаа оруулаад байсан “Аль-Кайда”-гийн жигүүрийн эсрэг Францаар ахлуулсан Африкийн холбооны цэргүүд байлдааны ажиллагаа явуулж байгаа бөгөөд саяхан тус жигүүрийн толгойлогч Моктар Белмоктар амь үрэгджээ. Холбоотнуудын дайралтын үеэр түүнийг Чадын цэрэг буудан хөнөөсөн гэж тус улсын телевиз болон Ерөнхийлөгч мэдээллээ. Түүнийг нэгдүгээр сард Алжирын газрын тос, байгалийн хийн үйлдвэрийг гадаад ажилчдынх нь хамт барьцаалж, 50 орчим хүн амь үрэгдсэн хэргийг удирдан зохион байгуулсан хэмээн буруутгаж байжээ. Олон улсын аюулгүйн хүчнийхэн Малийн хойд нутгийн Адрар- Ифорас уулан дахь террористуудын гол баазыг толгойлогч М.Белмохтар болон түүний орлогч Абдельхамид Абу Зейдыг нөлөө бүхий бусад дайчных нь хамт устгаж, олон тооны зэвсэг, техник, 60 гаруй тээврийн хэрэгсэл хураан авсан байна. Ингэснээр Малийн хойд нутаг террористуудаас бүрэн чөлөөлөгдөж байгаа аж.