Венесуэлийн ерөхийлөгч Уго Чавес нас барж Венесуэл орон бүхлээрээ хэрхэн гашуудаж буйг зурагтаар хараад ганц хоёр бодлоо бичихээр зорилоо. Хүн үхнэ гэдэг хорвоогийн жам. Далай лам ч үхлээс зугатаах аргагүй. Гэхдээ ерөнхийлөгч хүн үхнэ гэдэг ердийн хэрэг биш. Ард түмнийг удирдаж тэдний хувь заяаг шийдэж явах ёстой хүн үхнэ гэдэг том гарз. Хэн ч тэр хүмүүсийг уйл гэж тушааж эсвэл уйлаараа гэж 10 мянган төгрөг тараагаагүй л болов уу.

 

 

Уго Чавес энэ дэлхий дээр социалимзын тэгш эрх гэсэн онолыг бага ч гэсэн биелүүлэх гэж хичээж түүнийхээ төлөө бүхэл бүтэн Латин Америк тивийг доргиож цоо шинэ улстөрийн нөхцөл байдлыг үүсгэсэн. Яагаад гэвэл газрын тосны нөөцөөрөө 5-т ордог энэ орны ерөнхийлөгч олсон олзоо ард түмэндээ шууд тараасан. Бүгдээрээ олзоо шударга ёсоор хуваана. Энэ бас л улстөрийн онол. Венесуэл орон газрын тосны гадаадын компаниудыг бүгдийг нь хөөж гаргаж газрын баялгаа улсын өмч болгосон. Тиймээс энэ бүгдийг зоригтой хийж чадсан шийдэмгий Уго Чавес ард түмнийхээ баатар болсон. Тэр капитализмыг хазаарлаж ард түмэн хэнээс ч хүчтэй гэдгийг харуулсан.

 

Тиймээс түүнийг неолиберализмын эсрэг дайсан гэж Америкууд үргэлж гадуурхаж ирсэн. Нэгэнт би Монгол хүн болохоор өөрийнхөө л улс орныг бодож уул уурхайн олз хэний гарт ордог бол мөн Монголын ерөхийлөгч Уго Чавестай адил өгөөмөр сэтгэл гаргаж чадах болов уу гээд л олон зүйлийг эрэгцүүлэн бодлоо. Айвенхо Майнз, Рио Тинто гээд л гадны компаниудыг хөөж гаргах чансаатай аавын хүү Монголд алга. Харин ч төрийн удирдагчид маань гадныхантай хуйвалдаж хагартлаа баяжиж юун ард түмэндээ хувааж өгөх харин ард түмнийгээ өрөнд унагаж буйг бүгд л сонсож бас хэвлэл мэдээлэлээр мэдэж авсан.

 

Монголын төрийн удирдагчид бүгдээрээ л сая сая доллараар баяжжээ. Тэд ард түмэндээ туслах биш харин ард түмнээ дээрэмдэж гэмт хэрэгтэнгүүд болцгоожээ. Олон хүн гадаадад зугатаан гарч авгай хүүхэдтэйгээ баян тарган амьдарцгааж хүүхдүүдийнхээ нэр дээр данс нээж хүүхдүүддээ үнэ харахгүй байшин сууц авч өгч экс ерөнхий сайд эсвэл экс ерөнхийлөгч гэж нэрлэхэд ч гутамшиг болжээ.

 

Одоогийн ерөнхийлөгч болохоор шударга байя л даа гэж хашгирдаг. Ард түмэн тэртэй тэргүй шударга шүү дээ. Шударга ёсыг тогтоож хүчтэй төрийг л босгож ирэх чухал болохоос хоосон үг юу ч хийхгүй биз дээ. Уго Чавес шиг ганц амьдарсан амьдралаа ард түмэндээ зориулж энэ ертөнцөөс явахдаа нэртэй төртэй явна гэдэг ямар бахархмаар бас атаархмаар үхэл вэ? Төрийн тэргүүний алба хашихдаа ард түмнээ биш өөрийн авгай хүүхдээ л зөвхөн баяжуулдаг баяны төлөө төрийн удирдагчид ямар их харамсал вэ ямар их хараал идмээр вэ?

 

Монголын төрийн удирдагчид үхэхэд хэн уйлах бол яагаад уйлах бол? Ерөнхийлөгчийн үхэл гэдэг цааш олон асуултуудыг ардаа орхиж олон хүнийг нэг бол гашуудуулж нэг бол зэвүүцүлэх тийм л утга учиртай үхэл ажээ. Уго Чавес зөвхөн Латин Америкт биш Азид бас Африкт үлгэр жишээ болох ёстой. Ард түмнийхээ төлөө ерөнхийлөгчид нэгээр цөөрлөө. Уго Чавес аян замдаа сайн яваарай.

 

 

 

• Тэр ард түмнийхээ зүрхэнд үргэлж амьд