Улаан Кхмерүүдийн нөлөө бүхий удирдагч Иенг Сари нас барсныг Камбожийн шүүхийн албаныхан мэдээлэв. 87 настай түүнийг 1975-1979 оны үед Камбожид амь үрэгдсэн хоёр сая гаруй жирийн иргэний үхэлд буруутган шүүж байсан юм. Иенг Сари нь Улаан Кхмерүүдийн үед буюу 1975-1979 онд Камбожийн Гадаад харилцааны сайдаар ажиллаж байжээ. Түүнийг дээрх хэрэгт өөр гурван хүний хамт шүүж байсан ч бие нь муудаж энэ сарын 4-нөөс хойш эмнэлэгт хэвтэж байгаад өчигдөр өглөө амьсгал хураажээ. 2011 оны арваннэгдүгээр сараас хойш шүүгдэж буй Иенг Саригийн эхнэр Иенг Тирит шүүгдэгчдийн бүрэлдэхүүнд багтаж байсан ч мартах өвчний улмаас хуралд суух боломжгүй болсон юм. Иенг Сари 1998 онд Камбожийн ширэнгэн ойд нуугдаж байгаад нас барсан Улаан Кхмерүүдийн удирдагч Пол Пот /жинхэнэ нэр нь Салот Сар/-ын баз хүргэн нь аж. Хүн төрөлхтний түүхэнд хамгийн аймшигт хоморголон устгах ажиллагаа явуулсан Улаан Кхмерүүдын дэглэм 1979 онд Вьетнамын цэргүүд Камбожид орж ирснээр нурсан юм.