Америкийн Индиана мужийн Дэниел Брюингтон хэмээх эр шүүгч, прокурор нарыг интернэтээр шүүмжилснийхээ төлөө таван жилийн ял сонслоо. Дэниел 2007 онд гэр бүлээ цуцлуулах шүүх хурлын үеэр хоёр хүүхдээ өөр дээрээ авч чадаагүй тул шүүгч болон прокурорын үйл ажиллагааны талаар шүүмжлэлээ блогтоо бичиж эхэлсэн юм байна. Шүүхээс түүнийг 2009 онд хоёр охинтой уулзахыг зөвшөөрөхөд Дэниел ундууцан шүүгч нар хэтэрхий хатуу хандаж, үр хүүхдүүдийг нь зовоосон хэмээн блогтоо бичсэн юм байна. Мөн тэрээр шүүгчийг шийдвэрийг “Гал, бензинээр наадсантай адил явдал болсон” гэх мэтээр бичсэн нь шүүгчийн дургүйцлийг ихэд төрүүлсэн ажээ. Түүнийг блогоо хөтлөхөө болихыг удаа дараалан сануулсан ч “Намайг алсан хойно л би бичиж чадахгүй биз” хэмээн үл ойшоосон байдлаар ханджээ.Үүнийхээ дараагаар шүүхийн сэтгэлзүйч болон шүүгч, шүүгчийн эхнэрийг хүртэл зодохыг хүсч буйгаа блогтоо бичиж эхэлсэн байна. Тиймээс шүүгч бие хамгаалагч авсан гэнэ. “Энэ бол зүгээр л шүүгчийг шүүмжлэгч биш. Тэр бол хүмүүсийг заналхийлж, аюул учруулахыг завдагч” хэмээн шүүх Дэниелд таван жилийн ял оноосноо тайлбарлажээ. Ийнхүү шүүгч болон түүний гэр бүлийг айлган сүрдүүлсэн хэрэгтээ Дэниел таван жил шоронд суух болоод байна.