Нэг хэсэг гадаадын сэтгүүлчдэд өгсөн ярилцлагаар нь мэргэжлийн сумогийн дэвжээнд ид хаваа гайхуулсан Монгол 2 аваргыг “муудалцуулах” гэсэн асуулт тавьж түүнийг нь Харүмафүжи Асашёорүг мууллаа гэх мэтээр дэлхийд цацсан билээ. Бид Харүмафүжигийн гадаадын сэтгүүлчдэд өгсөн ярилцлагыг танд хүргэж байна. Учир нь мэргэжлийн сумо бөхийн 70 дахь аварга Харүмафүжи Токио хотын Япон дахь гадаад сэтгүүлчдийн клубт зочилжээ. Тэрээр энэ үеэр гадаад сэтгүүлчдийн сонирхсон асуултад хариулан, чөлөөт ярилцлага өрнүүлсэн байна. Харүмафүжигийн хувьд гадаад сэтгүүлчдэд анх удаа дэлгэрэнгүй ярилцлага өгсөн нь энэ юм. 
Америкийн сэтгүүлч:-Екозүна цолтой барилдсан анхны тэмцээнээ есөн даваатай дуусгасан. Тэгэхэд Японы хэвлэлүүд “Аварга цол авах хүн биш байж” гэх зэргээр хэлж байсан. Тэр үед юу бодогдож байв?
-Өөрийгөө дайчлан барилдаад ес ялсан болохоор энэ маягаараа дахиад бүх чадлаа дайчлан барилдаад байхад амжилт заавал ирнэ гэж бодож байлаа.
Германы сэтгуүлч: -Хөлбөмбөгт эсрэг багийнхаа тоглогчид, тактикийг судалдаг. Харин сумод барилдах өрсөлдөгчөө хэр судалдаг вэ? -Сумод толгой эсвэл цээжээрээ мөргөлдөн золгохоос өөр арга байдаггүй. Тийм болохоор өрсөлдөгчийнхөө золгон босдог арга, тактикийг судалдаг.
Бразилийн сэтгүүлч: -Өдөрт хэдэн калорийн илчлэгтэй хоол иддэг вэ?
-Дуртай хоолоо ямар ч хориггүй хүссэн хэмжээгээр иддэг. Миний идэх хоолыг хэн ч хорьж чадахгүй.
Германы сэтгүүлч: -Одоогийн залуус сумочдыг сайхан гэж бодож байгаа болов уу. Өмссөн хувцас, амьдралын хэв маяг гээд залуучуудад таалагддаггүй гэж би хувьдаа боддог?
-Эрт, одоо аль ч цагт сумочдын нандигнан хадгалж, дагаж мөрдөж явдаг зүйл бол сүмо бөхийн ёс заншил. Цаашдаа ч тийм байх болно. Сумочид одоогийн залууст таалагдах албагүй. Энэ бол Японы үндэсний спорт. Японы ард түмэн хэзээд үндэсний спортдоо элэгтэй байдгийг та бүхэн мэдэх байх.
Английн сэтгүүлч: -Японд гадаадын иргэд, цагаачдын асуудал хурцаар тавигддаг. Гадаадаас ирсэн та ёкозүна цол хүртээд өөрийгөө Японы нийгэмд хүлээн зөвшөөрөгдсөн гэж бодож байна уу?
-Гадаад орноос ирсэн ч гэсэн хүлээн авч, ирээдүй, мөрөөдөл олгосон Сумогийн холбоонд үнэн сэтгэлээсээ баярлаж явдаг.
Хятадын сэтгүүлч:-Зодог тайлсан Асашёорюүд хэт хатуу шийтгэл оноосон гэж бодож байна уу?
-Хэрэг хийсэн болохоор хариуцлагаа хүлээх нь мэдээж зүйл шүү дээ.
Францын сэтгүүлч: Таныг сайхан дуулдаг гэж сонссон?
-Монгол хүн бүр сайхан дуулдаг. Би ч гэсэн монгол хүн болохоор өөрийнхөө хэмжээнд дуулна. Монголчуудын дунд найранд гурван дуутай, наадамд гурван даваатай гэсэн үг байдаг.
Францын сэтгүүлч:- Японы сумочдоос ёкозүна болж чадахгүй байгаагийн учир юунд байна вэ?
-Гэхээс буцахгүй тэмцэж, зүтгэж байгаад озэки болж чадна. Харин ёкозүна болно гэдэг хувь заяа гэж боддог. Гэхдээ энэ бол зөвхөн миний бодол шүү.
Хятадын сэтгүүлч: Таныг Монголдоо очоод ирэхэд сумогийн холбооныхон дургүйцдэг гэсэн. Энэ үнэн үү? Сумогийн холбоо ганцхан хүнтэй биш шүү дээ. Тэгэхээр холбоонд ажиллаж байгаа хүмүүсээс дургүйцдэг хүн байхыг үгүйсгэхгүй. Гэхдээ намайг эх орондоо очно, очоод ирлээ гэхэд дургүйцэж байсан тохиолдол гараагүй. Чи бэлтгэлээ хийхгүй Монгол руугаа явлаа гэж хэн ч хэлж байгаагүй.
Америкийн сэтгүүлч: - Их аварга Хакүхотой барилдахдаа түүнийг япон гэж боддог уу, монгол гэж боддог уу?
-Япон иргэншилтэй л болохоос биш монгол хүн. Тэгэхээр мэдээж монгол хүн л гэж боддог. Түүний судсаар монгол хүний халуун цус гүйж байгаа.
Германы сэтгүүлч: -Надад нэг хүсэлт байна. Гуравдугаар сарын башёгийн дараа та гадаадын сэтгүүлчдийг дагуулаад нутагтаа очиж болох уу. Таны төрсөн нутагтаа танилцмаар байна?
-Мэдээж Монгол Улс миний төрж өссөн газар нутаг та бүхэнд нээлттэй. Гэхдээ башёгийн дараа гэж амлаж чадахгүй. Боломжтой үе гарвал бүгдээрээ цуг явж болох байх. Энэ асуултын хариуг би дараа нь хэлье.