Энэ өдрүүдэд Туркийн Самсун хотноо олон улсын жүдо бөхийн холбоо (IJF)- ны Гран-при шалгаруулах ээлжит тэмцээн болж байна. Тэмцээн хөнгөн жингийн барилдаанаар эхэлж, манай тамирчид жин тус бүр дээр алт, мөнгө, хүрэл медаль хүртлээ. Эрэгтэйчүүдийн 60 кг-д ОУХМ Д.Амартүвшин алт, 73 кг-ын жинд Гавьяат тамирчин С.Ням-Очир мөнгө, эмэгтэйчүүдийн 52 кг-д А.Цолмон хүрэл медалийн эзэн болсон байна. Самсуны Гран-при тэмцээнд дэлхийн 40 орны 318 жүдоч уламжлал ёсоор эрэгтэй, эмэгтэй тус бүр долоон жингийн ангилалд өрсөлдөж байна. Монголын багийн тухайд эрэгтэй долоо, эмэгтэй гурван тамирчны бүрэлдэхүүнтэй оролцож байгаа юм.