Үндэсний их баяр наадмыг зохион байгуулах үндэсний комисс хуралдаж, наадмын бэлтгэл ажлыг хангуулах тухай хэд хэдэн асуудлыг хэлэлцжээ. Энэ жилийн наадмын нээлт, хаалт болон ёслол хүндэтгэлийн арга хэмжээг илүү өвөрмөц, шинэлэг хэлбэрээр зохион байгуулахаар төлөвлөж байгаагаас гадна наадмын нээлтийн үйл ажиллагааг Монгол Улсын Төрийн шагналт, гавьяат жүжигчин Д.Сосорбарам найруулахаар болсон байна. Мөн Хүй долоон худагт 7000 гаруй автомашины зогсоол шинээр байгуулж, зөөвөрлөж угсрах боломжтой 3000 гаруй тохилог суудлыг байрлуулах аж. Түүнчлэн наадамчдын зорчих болон үйлчилгээний хэсгүүдэд эко хавтан тавьж, нийтийн бие засах газрыг нэмэгдүүлж, 361-ийн гармаас Хүй долоон худаг хүртэл шинээр автозам тавих гэнэ. Харин Төв цэнгэлдэх хүрээлэнд нийтийн бие засах газар шинээр байгуулахаас гадна наадамчдад наадмын үйл ажиллагаа, автомашины зосоол, үйлчилгээний тухай мэдээлэх самбаруудыг байрлуулахаар төлөвлөсөн бол сур, шагайн харвааны талбайд тохижилтын ажлыг шинээр хийх шаардлагатай гэж үзжээ. Энэ мэт нөхцөлийг бүрдүүлэхэд нийт 50 гаруй тэрбум төгрөг зарцуулах тооцоо байгаа аж. Үүнээс наадмын бодит үйл ажиллагаанд 3-4, хүй долоон худагт хийх бүтээн байгуулалтад 40 орчим тэрбум төгрөгийг зарцуулах юм байна. Хүй долоон худаг орчимд хийх зарим тохижилтын хөрөнгийг “Гудамж төсөл”-ийн хүрээнд “Чингис” бондоос гаргах боломжтой гэж Засгийн газраас үзжээ. Тиймээс баяр наадмыг зохион байгуулах комиссоос гаргаж буй эдгээр саналыг Засгийн газрын хуралдаанаар хэлэлцэн эцэслэн батлах юм байна. Дашрамд дуулгахад, Үндэсний их баяр наадмыг үзэж сонирхохоор манай оронд 12 мянга гаруй жуулчин ирэх ажээ.