Дэлхийн шилдэг хөлбөмбөгчдийн нэг, “Барселона” багийн довтлогч Леонель Месси блон түүний эцгийг татвар төлөөгүй хэмээн буруутгагдаад байгаа. Хэдий Месси өөрөө үүнийг үгүйсгэж байгаа ч Испанийн татварын алба түүнийг шүүхэд өгчээ. Испанийн хуулийн дагуу Месси үнэхээр татвар төлөөгүй бол зургаан жил шоронд хоригдох ялаар шийтгэгдэх аж. Испанийн хуулинд төрд 20 мянган еврогоос дээш орлогоо нуун дарагдуулсан, татвар төлөхөөс зайлсхийсэн хэн боловч эрүүгийн хариуцлага хүлээх ёстой болдог аж. Түүнчлэн Испанийн татварын алба шүүхээс үл хамааран төрд татвараа төлөөгүй иргэдийн хэргийг шийдвэрлэх эрхтэй байдаг байна.  Месси интернэтэд “Дөнгөж сая хэвлэл мэдээллийн хэрэгслүүдээс Испанийн татварын албанаас биднийг буруутгаж байгааг олж мэдлээ. Бид хэзээ ч ямар нэгэн хууль зөрчсөн үйлдэл гаргаж байгаагүй тул энэ мэдээ биднийг гайхашруулсан. Бид татвараа бүрэн төлж, иргэний үүргээ гүйцэтгэсээр ирсэн. Энэ хэргийг тодруулах болно” хэмээн бичжээ. Сануулахад зургадугаар сарын 12-нд Исапанийн татварын албаныхан Мессийг эцгийн хамт татварын бодлого султай Уругвай, Белиз зэрэг оронд байгаа гуравдагч этгээдэд дамжуулах замаар Испанийн төрөөс таван сая орчим еврогийн орлогоо нуун дарагдуулсан хэмээн буруутгасан юм. Үүнтэй холбогдуулан Испанийн Соёл, спортын сайд Хосе Игнасио Верт хэлэхдээ “хэрэв Л.Месси буруутай гэдэг нь нотлогдвол Испанийн бусад иргэдийн адил хариуцлагаа үүрэх ёстой болно. Ямар ч өршөөл байхгүй. Гэхдээ одоохондоо буруутай эсэх нь тогтоогдоогүй байгаа тул яаран дүгнэлт хийх аргагүй юм” гэжээ.