Хятадын хойд зүгийн Шаньси мужийн Шожоу хотод орших нэгэн зоогийн газар лхагва гарагийн үдэш хий дамжуулах хоолой дэлбэрч хоёр хүний аминд хүрчээ. Түүнчлэн 150 орчим хүн гэмтэж, түлэгдсэн бөгөөд 19 хүний биеийн байдал тун муу байгаа талаар “Синьхуа” агентлаг мэдээллээ. Хоёр давхар барилгад байрлах зоогийн газарт гарсан галыг гал сөнөөгчид газар авахуулалгүйгээр түргэн хугацаанд унтраагаагүй бол байдал үүнээс дордож болох байсан гэнэ. Дэлбэрэлтийн хүчинд ойролцоох барилга байшингуудын цонх хагарч, гал түймэртэй тэмцэх албаны гурван машин гэмтсэн байна. Түүнчлэн “Синьхуа” агентлагийн нийтэлсэн зургуудаас харахад ойр орчимд байсан суудлын тэрэгнүүдэд ч багагүй хохирол учирсан бололтой. Ослын болон аврах ажиллагааг өнөө өглөө гэхэд дуусгаж, эрх баригчид хэргийн нөхцөл байдлыг судлах, мөрдөх ажлыг эхлүүлжээ.