Үндэсний авто мото спортын клубын тамирчид ОХУ-ын Ангарск хотноо зохиогдсон аваргын хагас шигшээ уралдаанд оролцоод ирлээ. Уралдаанд 200 тамирчин долоон ангилалд өрсөлдсөн байна. Манай тамирчдаас эхний өдөр 50сс ангилалд хоёр тамирчин оролцсоноос Л.Оргил гурав, Б.Хонгор дөрөвдүгээр байрт шалгарчээ. Мөн энэ өдөр 250сс ангиллын уралдаан явагдаж манай дөрвөн тамирчин оролцсоноос ОУХМ Э.Халиунболд ширүүн өрсөлдөөнөөс мөнгөн медаль хүртсэн байна. ОУХМ Х.Тэмүүжин зургадугаар байр эзэлж, дэд мастер Т.Баярмагнай, залуу тамирчин Д.Мөнх-Оргил нар 20-24 дүгээр байрт оров. Уралдааны хоёр дахь өдөр 85сс ангилал, 125сс ангиллын уралдаанууд явагдсан. Залуу тамирчдын хувьд анх удаагаа олон улсын уралдаанд оролцож, олон хүнтэй гараанаас гарч, уралдаж үзсэн нь томоохон ололт байлаа. Гэсэн хэдий ч чамлахааргүй амжилтыг 85сс ангилалд оролцсон П.Эрдэнэпүрэв, П.Төрбат, Н.Итгэлхүслэн, Х.Баттүшиг нар үзүүлсэн. Мөн 125сс ангилалд гараанаас 23 тамирчин гарч уралдсанаас ОУХМ Э.Халиунболд эхний гараанд хоёрдугаар байр, дараагийн гараанд түрүүлсэнээр ОХУ-ын аваргын хагас шигшээгийн аварга болж алтан медаль хүртжээ.