-Бүстэй барилдаан бол ОХУ-ын үндэсний барилдаан. Зохион байгуулагч орны хувьд давуу эрхээ эдэлж энэ төрлийг оруулсан. Бүстэй барилдааны төрөлд манайхаас 15 тамирчин оролцоод нэг алт, нэг мөнгө, гурван хүрэл медаль хүртсэн.

-Энэ барилдаан нь хав дөрвөлжин золгож, бүс тавихгүй барилддаг. Гурван удаа бүс тавих юм бол торгоно. Баруун золгоод л бүс тавихгүй барилдана гэсэн үг. Өөрөөр хэлбэл, бүс тавихгүйгээр хутгах, тонгорох, шидэх мэх хийж оноо авна гэсэн үг. Нисэлттэй шидвэл цэвэр оноо буюу хоёр оноо авна. Нийт дөрвөн минутын хугацаатай барилддаг. Энэ барилдаанаар манай улс сүүлийн хоёр жил хичээллэж байгаа. Өнгөрсөн жил болон энэ жилийн Оюутны улсын аваргад энэ төрлөөр орсон. Универсиадад энэ төрөл орохоор заасан учраас бид хоёр жилийн өмнөөс бэлтгэл хийсэн.

-Би өмнө самбо, жудогоор хичээллэдэг байсан. Энэ нь бүстэй барилдааны төрөлд зодоглоход дөхөм болсон. Оюутны улсын аваргад оролцоод энэ төрөлдөө тэргүүн байр эзэлж, Универсиадад оролцох эрхээ олж авсан. Тэмцээнд амжилттай барилдахын тулд нэг жилийн хугацаанд уйгагүй бэлтгэл хийсэн дээ.

-Би гурван барилдаан хийсэн. Эхний барилдаанд Белорусын бөхиийг, хоёр дахь  арилдаанаар Тажгистаны бөхийг ялаад ОХУ-ын бөхөд ялагдсан. Ер нь Универсадад ОХУ-ын тамирчид үнэхээр илүү байсан. Арга ч үгүй биз өөрийн орны үндэсний барилдаан болохоор. Оросууд шидээ мэх сайн хийдэг. Би ч мөн адил энэ мэхэнд нь орсон.

-Манай тамирчид бол шахаж татах, хутгах, босоо байдлаас мэх хийхдээ сайн байсан. ОХУ зохион байгуулагч орны дэвжээ гэдэг утгаараа хөгжөөн дэмжигчид үнэхээр сэтгэл зүйд нөлөөлж байсан. ОХУ-ын тамирчинтай барилдах үед хөгжөөн дэмжигчдийн тэр сүрдмээр байдал үнэхээр сэтгэл зүйд нөлөөлж айж, сандрах байдал гарч байсан. Бусад орны тамирчидтай бол харьцангуй зоригтой барилдсан.

-МУБИС-ийн спорт заланд Болд-Эрдэнэ багш биднийг бэлтгэсэн. Харин тэмцээнд Шийрэв, Бат-Амгалан багш авч явсан. Бүстэй барилдааны цэвэр оноо нь ерөөсөө л шидэх мэх байдаг. Манайхан нуруугаар бага учраас шидэхээсээ хальшраад байсан. Уг нь бол хав золгочихсон байрлалаас шидэхэд хялбар байдаг. Нийт зургаан оноогоор цэвэр ялдаг. Нэг удаа шидэж дээш харуулахад хоёр оноо авна, нийт гурван удаа шидэж дээш харуулж байж ялна гэж ойлгож болно.

-Универсиадад би жин нэмж орсон. Тиймээс өрсөлдөгч бөх маань том биетэй байж таарна. Энэ нь хамгаалж барилдахад хүндрэлтэй байсан. Сая нэмэх 76 кг-ын жинд барилдсан. Одоо дэлхийн аваргад хасах жинд барилдана. Дэлхийн аваргад тонгороо, хутгаа, шидэх мэх хийхээр бодож бэлтгэлээ хийж байна. Өөрөө Универсиадад хэд хэдэн удаа шидүүлсэн хүн чинь, дэлхийн аваргад шидэх мэхээр өрсөлдөгчөө буулгаж авна гэсэн бодолтой байгаа. /инээв/