Наймдугаар сарын гурванд Интерполоос дэлхий нийтийн аюулгүй байдалд аюул занал учирсан талаар сэрэмжлүүллээ. Энэ нь Ирак, Лив, Пакистан зэрэг улсуудад байрлалтай шоронгуудаас онц аюултай хоригдлууд зугтсантай холбоотой юм байна. Энэ хэргийг алан хядах“ Аль Кайда” бүлэглэл зохион байгуулсан байх магадлалтай талаар “Agence France-Presse” мэдээлсэн байна. Олон улсын Эрүүгийн цагдаагийн байгууллагын мэдээлснээр энэ маягаар сүүлийн сард дээрх шоронгуудаас хэдэн зуун алан хядагч, гэмт хэрэгтнүүд зугтаж, эрх чөлөөтэй болсон байна.

Тиймээс Интерполоос эдгээр орголтууд хоорондоо холбоотой байсан эсэхийг тодорхойлох болон үүнтэй холбогдон гарах ээлжит халдлагуудыг таслан зогсоохын тулд хэргийг мөрдөх ажиллагаанд туслахыг өөрийн бүрэлдэхүүнд багтдаг орнуудад уриалсан байна.

Тус байгууллагаас өчигдөр буюу наймдугаар сарын дөрвөнд Их Британи, АНУ, Герман, Франц улсууд лалын шашинт дээрх орнууд дахь дипломат төлөөлөгчийн газруудаа сүрдүүлгээс болж түр хугацаанд хаах шийдвэр гаргасантай холбогдуулан энэхүү анхааруулгыг нийтэлжээ.