Ираны Гадаад хэргийн сайд Мохамед Жавад Зариф исламын суннит болон шийт урсгалынхны хоорондох зөрчил мөргөлдөөнийг дэлхийн аюулгүй байдалд заналхийлж байгаа хамгийн том аюул гэлээ. Суннитууд голдуу аж төрдөг Сири, Ирак, Пакистан зэрэг улсыг дотоодын үймээн самуунаа хугацаа алдалгүй намжааж, шашин хоорондын мөргөлдөөнийг таслан зогсоохгүй бол эдгээр улсаас болж дэлхий дахин цаашид энх амгалан байх эсэх асуудал хөндөгдөх болно гэж тэрбээр онцолсон байна. Исламын хоёр гол урсгалын зөрчил мянгаад жилийн түүхтэй бөгөөд 2003 онд АНУ Иракийг эзэлснээс хойш бүр ч хурцадсан юм. Зөвхөн энэ онд гэхэд л Иракт шашин хоорондын мөргөлдөөнөөс болж 6500 орчим энгийн иргэн амь үрэгдээд байна. Энэ нь 2008 оноос хойших хамгийн их тоо юм. Шашны зөрчлөөс болж дэгдээгүй ч шашин хоорондын тэмцэл болтлоо даамжирсан Сирийн иргэний дайныг мөн Зариф онцолжээ. Тус улсын иргэдийн олонхи нь суннит урсгалынх бол Ерөнхийлөгч Башар аль-Ассад шийт шашинтан бөгөөд шийтүүд голдуу амьдардаг Ираны гол холбоотон юм. Харин Сирийн суннит сөрөг хүчнийг Турк, Саудын Араб зэрэг суннит орнууд дэмжиж байна.