Бельгийн хууль тогтоогчид эдгэршгүй өвчтэй болон биеийн байдал нь тун муу байгаа хүүхдүүдэд “Үхэх эрх” олгож, зовлон шаналалыг нь эцэслэх хуулийн төслийг авч хэлэлцэж байна. Энэрэнгүй үзлийн үүднээс насны хязгаартайгаар эвтанази буюу эдгэршгүй өвчин туссан хүмүүсийг зовоолгүй үхүүлэх хуультай ээлжит улсаар Бельги тодорч мэдэхээр байгаа юм. Насны хязгаартайгаар гэдэг нь эцэг эхийнх нь зөвшөөрөлтэйгөөр насанд хүрээгүй, өвчиндөө тарчилж буй хүүхдүүдийг өвчингүй нүд аниулахыг хэлж байгаа юм. Уг хуулийн төслийг парламентад өргөн барихын тулд өнөөдөр сенатын төвшинд санал хураалт явуулж, эхний байдлаар шийдвэр гаргана. Хэдийгээр энэ хуулийн төсөл нь энэрэнгүй үзэлд тулгуурласан ч улс төрийн зарим хүчин бага насны хүүхдүүдийн амьдрах эрхийг боогдуулсан харгис шийдвэр гэж үзэж буйгаа илэрхийллээ. Мөн шашны бүлэглэлүүд ч гэсэн уг хуультай санал нийлэхгүй байгаагаа илэрхийлж байна. Недерланд улсад ийм арга хэмжээг хэрэгжүүлдэг ч насны хязгаарыг нь 12 гэж заажээ. Харин Бельги улсын тухайд бол насны дээд хязгаарыг 16 гэж заасан аж. Улс төрийн шинжээчдийн үзэж буйгаар эвтаназийн хууль батлагдах магадлал өндөр байгаа юм байна.